Имсол Рӯзи ҷавонони Тоҷикистон аз солҳои қаблӣ дида, боз ҳам дучанд хотирмону фаромушношуданӣ ва дар сатҳи баланд таҷлил гардид.

Аз субҳи 23- май, ки ҳамчун Рӯзи ҷавонони Тоҷикистон дар кишвар эълон гардидааст, дар тамоми кӯчаву хиёбонҳои шаҳр ҷавонон бо рӯҳи болидаву ифтихори ватандорӣ ва шукргузорӣ аз сулҳу оромии сартосарӣ гаштугузори идона менамуданд.

Махсусан, дар имрӯз Боғи фарҳангӣ-фароғатии Ирам қабои идонаи ҷавонӣ ба бар карда буд. Зеро боғи мазкур аз субҳи барвақт лабрези ҷавонони хушбахту хуштолеъ буду онҳо дар гӯшаҳои гуногуни ин боғ сайругашту хушнудӣ мекарданду зери навои ҷавонӣ мерақсиданду меболиданд.

Рӯзи ҷавонони Тоҷикистон дар боғи мазкур бо шукуҳу шаҳомати хосса таҷлил гардида, дар гӯшаҳои гуногун намоиши дастовардҳои ҷавонони кишвар ва муассисаҳои гуногуне, ки дар самти тарбияи ҷавонон кору фаъолият менамоянд, баргузор гардид.

Дар намоишгоҳи мазкур маҳсули дасти ҷавонони ихтироъкору навовар ва ҳунармандон ба маърази тамошо гузошта шуда, ҳар яки он диққати бинандаро ба худ ҷалб мекард.
Таҷлили иди пуршукуҳи Рӯзи ҷавонони Тоҷикистонро боз ҳам анбуҳи ҷавонони шодмон бо шухиву хандаҳои ҷавонӣ ва сару либоси идона зебу зиннат медоданд, ки ҳар бинандаи ин манзара шукргузорӣ аз фазои орому осудаи ватан менамояду ифтихор мекунанд, ки дар чунин ватани азизу маҳбуб умр ба сар мебарад.

Меҳмонон аз намоишгоҳи идона, ки ба ифтихори таҷлили Рӯзи ҷавонони Тоҷикистон ороста гардида буд, дидан намуда, сипас дар Амфитеатри боғи Ирам бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон консерти идона бо иштироки беҳтарин сарояндагони шинохтаи кишвар, ромишгарону раққосон ва ҳаҷвнигорони ҷавон таҳти унвони “Шоми ҷавонӣ” баргузор гардид.

Дар консерти идона намояндагон аз идораҳои гуногуни давлатӣ, варзишгарон ва 1000 нафар ҷавонони фаъоли кишвар иштирок намуда, Рӯзи ҷавонони Тоҷикистонро бо тантана таҷлил намуданд.