Дар нишасти матбуотии Кумитаи давлатии идораи замин ва геодезии Ҷумҳурии Тоҷикистон раиси кумита Ориф Хоҷазода оид ба натиҷаҳои фаъолияти соҳа дар нимсолаи аввали соли ҷорӣ маълумот пешниҳод намуд.

Зимни нишаст зикр гардид, ки дар шаш моҳи гузашта дар кишвар 7661 ҳолати вайронкунии қонунгузории замин ошкор шудааст. Бо мақсади бартараф намудани қонунвайронкуниҳои ошкоргардида ба масъулин 6784 дастур дода шудааст.

Ба гуфтаи Ориф Хоҷазода, нисбати 6943 ҳолати қонунвайронкунӣ парвандаҳои ҳуқуқвайронкунии маъмурӣ тартиб дода шуда, қарорҳои ҷаримабандӣ ба маблағи умумии 4 миллиону 247 ҳазору 125 сомонӣ қабул гардидаанд. Аз ин маблағ то имрӯз 3 миллиону 567 ҳазору 535 сомонӣ ба суратҳисоби махсус ворид шудааст.

Ҳамзамон, 228 парванда барои иҷрои маҷбурӣ ба иҷрочиёни Хадамоти иҷрои назди Ҳукумати Ҷумҳурии Тоҷикистон ирсол гардида, дар натиҷаи чораҳои андешидашуда 4945 ҳолати вайронкунии қонунгузории замин дар маҳал бартараф карда шудааст.

Раиси Кумитаи давлатии идораи замин ва геодезии Ҷумҳурии Тоҷикистон таъкид намуд, ки кумита минбаъд низ ҷиҳати пурзӯр намудани назорати давлатии истифодаи мақсадноки замин, пешгирии қонунвайронкуниҳо ва таъмини риояи талаботи қонунгузории замин тадбирҳои заруриро идома хоҳад дод.

Яҳё МАҲМАДНАБИЕВ, “ҶТ”