Имрӯз, 23 июл бахшида ба бузургдошти 1050-солагии Робиаи Балхӣ бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳамоиши ҷашнии ҷавонону варзишгарон таҳти унвони “Робиаи Балхӣ- нахустбонуи соҳибдевони адабиёти тоҷику форс” баргузор гардид.

Ҳамоишро Шабнам Раҳимзода, муовини аввали раиси Кумитаи кор бо ҷавонон ва варзиш оғоз намуда, иброз дошт, ки дар осори Робиаи Балхӣ ҳар як байт аз муҳаббат, покизагӣ, озодандешӣ, инсондӯстӣ ва садоқат ба арзишҳои болои инсонӣ шаҳодат медиҳад. Симои ӯ имрӯз барои ҷавонон ҳамчун намунаи маърифат, иродаи қавӣ ва худшиносии фарҳангӣ арзишманд мебошад.

Ҳамчунин, ректори Донишгоҳи байналмиллалии забонҳои хориҷии Тоҷикистон ба номи Сотим Улуғзода, доктори илмҳои филология, профессор Жило Гулназарзода суханронӣ намуда, омӯзиши ашъори кам вале густурдаи Робиаи Балхиро барои имрӯзиён зарур шуморид. Дар ин самт ӯ аз ташаббусҳои Президенти кишвар муҳтарам Эмомалӣ Раҳмон ёдовар шуда, зикр намуд, ки дар даврони соҳибистиқлолӣ бо роҳнамоии Пешвои муаззами миллат арҷгузорӣ ба фарҳангу тамаддуни тоҷик ва муаррифӣ намудани он дар арсаи байналмиллалӣ хеле вусъат ётааст. Аз ҷумла ворид гаштани 1050-солагии Робиаи Балхӣ ба Феҳристи бузургдоштҳои ЮНЕСКО барои солҳои 2026-2027 яке аз ташаббусҳои мондагор ва таърихии Сарвари давлат аст.

Дар идомаи ҳамоиш аз ҷониби директори Институти забон ва адабиёти ба номи Абуабдуллоҳи Рӯдакии Академияи миллии илмҳои Тоҷикистон, доктори илмҳои филологӣ, профессор Фарангис Шарифзода ва узви вобастаи Академияи миллии илмҳои Тоҷикистон Ҳасани Султон низ маърузаҳои илмӣ ироа гардида, доир ба ҳаёт ва паҳлӯҳои гуногуни эҷодиёти ин нахустбонуи соҳибдевони адабиёти тоҷику форс маълумотҳо пешниҳод шуд.

Аз ҷумла, гуфта шуд, ки дар сурудаҳои Робиа ишқу муҳаббати поки инсонӣ ҷойгоҳи муҳим дорад. Ҳамин аст, ки то ба имрӯз ин сурудаҳо вирди забони алоқамандони шеъру адаб қарор гирифтаанд. Робиаи Балхӣ ба забони тоҷикӣ-форсӣ ва арабӣ шеър суруда, ба ҳар ду забон девон доштааст, вале мутаассифона, бар асари нобасомонӣ ва ҳаводиси рӯзгор аз сурудаҳои зиёди ӯ то замони мо миқдори кам боқӣ мондааст.

Дар анҷоми ҳамоиш викторина доир гардида ба иштирокчиён вобаста ба ҳаёту эҷодиёти Робияи Балхӣ саволҳо пешниҳод шуд. Ғолибон бо туҳфаҳо қадрдонӣ шуданд.

Сайёраи ҚИЁМИДДИН, “ҶТ”