ЮНЕСКО оши палавро ба Рӯйхати мероси фарҳанги ғайримоддии ҷаҳон шомил кард. Ду рӯз қабл Наврӯз низ ба ин рӯйхат ворид шуда буд.

Кумитаи ҳифзи мероси фарҳанги ғайримоддии ЮНЕСКО – Идораи илму фарҳанги Созмони Милали Муттаҳид - дар ҷаласаи солонааш дар Адис-Адеба, пойтахти кишвари африқоии Эфиопия оши палавро ба Рӯйхати мероси фарҳанги ғайримоддии башарият ворид кард. Оши палав аз номи Тоҷикистону Узбекистон пешбарӣ шуда буд.

Дар муаррифиномаи оши палав, ки аз номи Тоҷикистон дар ҷаласаи Адис-Адеба қироат шуд, аз ҷумла гуфта мешавад: "Оши палав дар Тоҷикистон ғизои суннатиест, ки як бахши мероси умумии фарҳангӣ ба шумор меравад. "Шоҳи ғизоҳо", ки дар Тоҷикистон оши палавро чунин ном мебаранд, аз биринҷ, гӯшт ва хушхӯриҳо таҳия мешавад ва беш аз 200 тарзи таҳияи он вуҷуд дорад. Таҳия ва истеъмоли ош ангезаҳои иҷтимоӣ дорад, мардумро аз қишрҳову бахшҳои гуногуни ҷомеа муттаҳид мекунад. Оши палав ҳам ба сифати хӯроки ҳаррӯза таҳия мешавад, ҳам дар зиёфату маъракаҳо ва як бахши иҷрои маросимҳост”.

ЮНЕСКО бо ҳамроҳ кардани оши палав ва 12 арзиши дигари халқҳои гуногун раванди имсолаи такмили ба Рӯйхати мероси фарҳанги ғайримоддии башариятро ба поён овард. То имрӯз ин рӯйхат, ки соли 2008 бо ҳадафи ҳифзи ин суннатҳову арзишҳои халъҳои гуногуни олам таъсис шудааст, 366 номгӯро дар бар мегирад.

Ҷаласаи солонаи Кумитаи ЮНЕСКО дар пойтахти Эфиопия 28 ноябр оғоз ёфта, имрӯз - 2 декабр ба анҷом мерасад.