Дар Донишгоҳи давлатии тиҷорати Тоҷикистон корҳои байналмилалӣ яке аз самтҳои муҳимми рушд ба шумор рафта, барои ворид шудан ба фазои ягонаи таҳсилоти байналмилалӣ замина мегузорад.

Дар ин бора 25 июл Хайрулло Назарзода, ректори Донишгоҳи давлатии тиҷорати Тоҷикистон зимни нишасти матбуотӣ иттилоъ дод.

- Таваҷҷуҳи махсус ба ҷалби мутахассисони баландихтисос, амалисозии барномаҳои муштараки таълимӣ бо муассисаҳои таҳсилоти олии хориҷи кишвар, рушди корҳои илмию тадқиқотӣ, ҳамкориҳои мутақобилан судманд бо ташкилотҳои байналмилалӣ, гузаронидани барномаҳои таълимӣ аз аккредитатсияи байналмилалӣ ва тавсеаи низоми мубодилаи академӣ зоҳир карда мешавад, - илова намуд ректор.

Таъкид гардид, ки ДДТТ яке аз аввалин донишгоҳҳоест, ки дастпарварон ва омӯзгоронаш дар хориҷи кишвар (Полша, Испания, Италия, Португалия, Австрия) рисолаи доктор PhD ҳимоя намудаанд, ки ҳоло дар донишгоҳ ва дигар сохторҳои кишварамон кору фаъолият карда истодаанд.

Ректори донишгоҳ дар идома илова намуд, ки 2 сол боз дар донишгоҳ Маркази андоз ва суғурта амал мекунад, ки фаъолияти он дар ҳамкорӣ бо Бонки миллии кишвар ба роҳ монда шудааст. Ҳамчунин, соли гузашта филиали кафедраи андоз ва суғурта ташкил карда шуд, ки мутахассисонро дар ин соҳа омода мекунад.