Имрӯз, 9 май, Пешвои миллат, Президенти ҷумҳурӣ Эмомалӣ Раҳмон дар Боғи Ғалабаи пойтахт ба муносибати 71-умин солгарди ғалаба дар Ҷанги Бузурги Ватании солҳои 1941-1945 ба хотири шаҳидони роҳи озодӣ гулчанбар гузошт. Ба ин муносибат майдони маросимҳои Боғи Ғалаба идона ороста шуд.



Ҷанги Бузурги Ватанӣ аз ҷумлаи “фоҷиабортарин ҷангҳо” дар таърихи инсоният маҳсуб меёбад. Ёдовар мешавем, ки беш аз 300 ҳазор фиристодагони Тоҷикистон дар набардҳои шадиди ин ҷанги пурдаҳшат шуҷоату мардонагӣ нишон дода, 92 ҳазор нафари онҳо ба хотири адо кардани қарзи фарзандии хеш ҷон супурдаанд. Шуҷоату диловарии мардуми баору номуси Тоҷикистон дар солҳои Ҷанги Бузурги Ватанӣ намунаи олии ватандӯстӣ ва сабақи беҳтарини мардонагиву ватандорӣ барои наслҳои имрӯзу оянда мебошад.



Ба муносибати Рӯзи Ғалаба инчунин гулчанбарҳо аз номи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, Ҳукумати Ҷумҳурии Тоҷикистон, собиқадорони ҷангу меҳнат, корпуси дипломатии муқими Ҷумҳурии Тоҷикистон, сохторҳои қудратии Тоҷикистон, Пойгоҳи низомии 201-уми Федератсияи Русия дар Тоҷикистон гузошта шуд.

Хотираи неки қурбониёни Ҷанги Бузурги Ватанӣ, ҳамчунин бо дақиқаи хомӯшӣ пос дошта шуд.



Имсол дар асоси Амри Сарвари давлат аз ҳисоби Фонди захиравии Президенти ҷумҳурӣ ба 639 нафар иштирокчӣ ва маъюбони Ҷанги Бузурги Ватанӣ 1 миллиону 278 ҳазор сомонӣ, ба ҳар нафар 2000 сомонӣ, ҷудо шуда, дастрас гардид.