4 март дар “Кохи Суруш”-и шаҳри Душанбе бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи Модар чорабинии фарҳангии идона зери унвони “Ҳикмати Модар” баргузор гардид.

Дар чорабинӣ Зулфиқор Гулаҳмадзода, раиси Кумитаи кор бо ҷавонон ва варзиш, Бунафша Файзиддинзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон, ҳамчунин занону модарон аз ҳисоби сиёсатмадорону фарҳангиён, ходимони давлативу ҷамъиятӣ ширкат доштанд.

Дар чорабинӣ зикр гардид, ки имрӯз занону модарони кишвар қариб дар тамоми соҳаҳо фаъолияти назаррас нишон дода, саҳми арзандаи хешро дар пешрафту рушди соҳаҳо гузошта истодаанд.

Инчунин, гуфта шуд, ки иштироки занон дар идоракунии давлатӣ ва сохторҳои роҳбарикунанда ба таҳкими низоми идоракунӣ мусоидат мекунад ва таҷриба нишон медиҳад, ки ҷалби бонувон ба қабули қарорҳо метавонад ба баланд шудани ҳисси масъулият, гуногунандешӣ ва самаранокии сиёсати давлатӣ оварда мерасонад.

Таъкид гардид, ки занон бо эҳсоси баланди масъулият метавонанд дар ҳалли масъалаҳои муҳими ҷомеа саҳми муассир гузоранд. Аз ин ҷост, ки сиёсати кадрии давлат ба омода намудани занони ҷавон барои вазифаҳои роҳбарикунанда аҳамияти аввалиндараҷа медиҳад.

Зикр шуд, ки занону бонувон нақши бузург дар ҳифзи арзишҳои миллӣ ва таҳкими худшиносии миллӣ доранд. Дар замони муосир, ки равандҳои фарҳангии беруна ба ҷомеа таъсир мерасонанд, маҳз зан ҳамчун нигаҳдорандаи суннатҳо, забон ва фарҳанги миллӣ баромад мекунад. Тарбияи насли наврас дар руҳияи ватандӯстӣ, эҳтиром ба арзишҳои таърихӣ ва масъулияти шаҳрвандӣ бевосита ба мавқеи иҷтимоии зан вобаста аст. Аз ин рӯ, рушди ҷомеаи муосир бидуни иштироки фаъоли занон ғайримумкин аст.

Дар идомаи чорабинии фарҳангӣ аз ҷониби ҳунармандон сурудҳо дар васфи модар пешкаши ҳозирин шуд.

Ҳамчунин, ёдрас мешавем, ки таҳти чунин ном (“Ҳикмати Модар”) аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади арҷгузорӣ ба мақому манзалати Зан-Модар ва дар арафаи Рӯзи Модар аксияи ҷумҳуриявӣ роҳандозӣ шуд, ки дар доираи он гулдухтарони Кумита ба аёдати собиқадорон ва бонувони фаъолу хизматнишондодаи соҳаҳои гуногун рафта, ба онҳо ҳамчун рамзи эҳтиром ва армуғони баҳорӣ либоси миллии тоҷикӣ - чаканро бо тамоми унсурҳояш тақдим намуданд.

Гулафшон КАРИМОВА,
Малика МУҚАДДАМОВА, “ҶТ”