Афзоиши шумораи гирандагони он аз 12 ба 30 дар рушди минбаъдаи илми тоҷик чӣ таъсир хоҳад гузошт?

Ҷавонони замони истиқлол басо хушбахтанд, зеро пайваста аз дастгириҳои Ҳукумати кишвар ва Сарвари ҷавонпарвари он бархурдор мегарданд. Дар қатори фароҳам овардани имконот барои таҳсилу омӯзиш, фаъ-олият ва муаррифии ватани маҳбуб, инчунин барои ҳавасмандсозӣ ва боз ҳам ба дастовардҳои бештар расонидани онҳо аз ҷониби давлату Ҳукумат як қатор ҷоизаҳо ташкил гардидаанд. Яке аз онҳо ин Ҷоизаи ба номи Исмоили Сомонӣ барои олимони ҷавон мебошад. Он ҳамасола ба ҷавононе, ки дар соҳаи илм ва техника ба дастовардҳои назаррас ноил гаштаанд, тақдим мегардад.

Имсол бахшида ба 35-солагии Истиқлоли давлатии Ҷумҳурии Тоҷикистон бо ташаббуси Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати дастгирӣ ва ҳавасмандгардонии олимони ҷавон, шумораи гирандагони Ҷоизаи ба номи Исмоили Сомонӣ зиёд карда шуд.

Дар ин маврид, қарори Ҳукумати Ҷумҳурии Тоҷикистон аз 28 майи соли 2026, №307 “Дар бораи ворид намудани тағйирот ба қарори Ҳукумати Ҷумҳурии Тоҷикистон аз 29 майи соли 2023, №207” қабул гардид. Аз ҷумла, тибқи низомномаи озмуни мазкур олимони ҷавоне, ки дар соҳаи илм ва техника ба дастовардҳои назаррас ноил гардидаанд, аз 12 нафар ба 30 нафар зиёд карда шудааст. Ҷоизаи ба номи Исмоили Сомонӣ барои олимони ҷавон як воситаи муҳими ҳавасмандгардонӣ ва ҷалби ҷавонони дигар дар илмомӯзӣ ва касбомӯзӣ арзёбӣ мегардад.

Воқеан, қабули қарори мазкур бозгӯи таваҷҷуҳи хосаи давлату Ҳукумат ба рушди илм ва дастгирии олимони ҷавон буда, ҳамчун намунаи равшани татбиқи сиёсати ҷавонпарваронаи Пешвои миллат муҳтарам Эмомалӣ Раҳмон барои таҳкими иқтидори илмӣ ва инноватсионии мамлакат арзёбӣ мегардад.

АЗ 12 ТО 30. ДОВТАЛАБОНРО КАДОМ ТАЛАБОТ ИНТИЗОР АСТ?

Ба гуфтаи Азизуллозода Зуҳурбек, мутахассиси пешбари шуъбаи таъминоти ҳуқуқии дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ҳамасола то соли 2025 шумораи гирандагони ин ҷоиза 12 нафарро ташкил медод, вале имсол куллан фарқкунанда шудааст.

- Довталабон, 12 нафар аз рӯйи 8 бахш соҳиби ҷоиза мешуданд, вале имсол бо сабаби дар арафаи 35-солагии Истиқлоли кишвар қарор доштанамон бо дастуру супоришҳои Ҳукумати кишвар ин шумора зиёд карда шуданд. Мо итминон дорем, ки ин теъдоди гирандагони Ҷоизаи ба номи Исмоили Сомонӣ дар солҳои дигар аз 30 нафар ҳам зиёд хоҳад шуд, - мегуяд Азизуллозода.

Ба андеша ӯ, ҷавононе, ки соҳиби ин ҷоиза мегарданд, гӯё як қадами бузурге барои расидан ба мақсадҳои худ гузоштаанд. Яъне, онҳо аз ҷониби кишвар дасгирӣ меёбанд ва соҳиби мукофотҳои хотирмон мегарданд.

Бояд гуфт, ки аз 30-юми августи соли 1998, ҷиҳати танзими фаъолияти қарори Ҳукумати Ҷумҳурии Тоҷикистон, таҳти №301, оиди тасдиқ намудани низомнома “Дар бораи Ҷоизаи ба номи Исмоили Сомонӣ” барои олимони ҷавоне, ки дар соҳаи илм ва техника корҳои намоён анҷом доданд, ба имзо расидааст. Низомномаи мазкур тартиби пешниҳод, иштирок ва сарфарозгардонии довталабонро барои дарёфти ҷоизаи Исмоили Сомонӣ танзим менамояд ва тибқи талаботи низомнома нафароне, ки ғолиб мегарданд, мукофотпулӣ ба миқдори 1000 доллари амрикоӣ интизори онҳост.

Ба гуфтаи Азизуллозода Зуҳурбек ҷоизаи мазкур қадршиносии хизматҳои шоистаи олимони ҷавон дар назди ҷомеа ва давлат ба ҳисоб меравад. Ҳавасмандгардонӣ, инчунин баланд бардоштани лаёқати эҷодии олимону муҳаққиқони ҷавон ба рушду иқтидори илму техника мусоидат менамояд.

ДОВТАЛАБОН ҲАМ АФЗОИШ МЕЁБАНД

Аз назари масъулини Кумита пешниҳоди ин иқдом дар рушди тафаккур ва шахсияти ҷавонон таъсири амиқе мебозад ва дар рушди илми тоҷик саҳми назаррас мегузорад.

- Бояд қайд намуд, ки тибқи талаботи муққараргардида довталабони ҷоиза дар соҳаи илм, корманди муассисаи илмӣ, илмию тадқиқотӣ ва таҳсилоти касбӣ, инчунин мутахассиси соҳаҳои мухталифи хоҷагии халқ мебошанд, ки ба рушди илм саҳми арзанда гузошта, дорои дараҷаи илмӣ, аз ҷумла номзадҳои илм, доктори фалсафа, доктор аз рӯйи ихтисос, докторони илм низ ба ҳисоб мераванд ва талаботи низомнома низ ҳамин чизро талаб мекунад, - иброз дошт Зуҳурбек.

Ҳамчунин, ӯ мегӯяд, олимоне, ки дар ин самт барои дарёфти Ҷоизаи ба номи Исмоили Сомонӣ ҳуҷҷат пешниҳод менамоянд, асосан мекӯшанд, ки мақолаҳои илмии худро дар маҷаллаҳои бонуфузи илмие, ки дар хориҷи кишвар чоп мешаванд ва аҳли илм аз тамоми дунё аз он истифода мебаранд, нашр кунанд.

Воқеан, ин ҳамаро метавон натиҷаи сиёсати хирадмандона ва ҷавонпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳисобид. Маҳз ташаббусҳои Сарвари давлат аст, ки ҳамасола шумораи довталабон ба ин ҷоиза дар ҳоли афзоиш аст.

- Дар соли 2025 86 нафар довталаб аз рӯйи 8 самти илм барои дарёфти ҷоизаи мазкур ҳуҷҷат пешниҳод намуданд ва дар соли 2026 бошад, ин адад аз рӯйи самтҳои мазкур ба 102 нафар баробар шуд. Яъне, ин шумора нисбат ба соли гузашта 16 нафар зиёд шудааст, - мегӯяд Азизуллозода Зуҳурбек.

НАҚШИ КҶВ ДАР АМАЛИШАВИИ ИН ТАШАББУС

Кумитаи кор бо ҷавонон ва варзиши назди Ҳукумати Ҷумҳурии Тоҷикистон масъули асосии ин озмун арзёбӣ мегардад ва нақши он дар таъмини баргузории шаффофи озмуни мазкур хеле калон аст.

Ба гуфтаи Азизуллозода Зуҳурбек, мутахассиси пешбари шуъбаи таъминоти ҳуқуқии дастгоҳи марказии Кумитаи кор бо ҷавонон ва варзиш, Кумита ҳамасола тавассути васоити ахбори омма ва тариқи мактуби расмӣ ба вазорату идораҳои дахлдори кишвар, озмунро барои Ҷоизаи ба номи Исмоили Сомонӣ эълон менамояд.

Ҳамзамон, ба иловаи ӯ раванди қабули ҳуҷатҳо аз ҷониби Кумита ба муҳлати 3 моҳ идома меёбад ва бояд дар ин муддат довталабон ҳуҷҷатҳои худро супоранд. Баргузории озмун дар сатҳи баланд ва интихоби комиссия низ ба уҳдаи Кумитаи кор бо ҷавонон ва варзиш аст.

- Баъдан ҷиҳати дар сатҳи баланд ва шафоф баргузор кардани озмуни мазкур Кумита ҳамасола камиссияро дар ҳайати масъулони Ҳукумати Ҷумҳурии Тоҷикистон ва олимону муҳақиқони варзидаи муассисаҳои илмии кишвар, намояндагони масъули Дастгоҳи иҷроияи Президенти Ҷумҳурии Тоҷикистон низ таъсис медиҳад, - иброз дошт номбурда.

Воқеан, иқдоми навбатии Пешвои миллат метавонад бори дигар далели таваҷҷуҳи бевоситаи Ҳукумати мамлакат ба ҷавонони созандаи кишвар бошад. Онҳое, ки то ин дам сазовори ин ҷоиза гардидаанд, бо талошҳову омӯхтанҳои худ мехоҳанд исбот созанд, ки ҷавонони арзандаи миллатанд. Акнун бо зиёд шудани шумораи гирандагони ин Ҷоиза метавон бо боварӣ зикр кард, ки шумораи ҷавонони илмдӯст, донишманд, пурталошу заковатманд низ дар ин қатор меафзояд ва василаи рушди минбаъдаи илми тоҷик хоҳад гашт.

Сафиаллоҳ ИБОДЗОДА, “ҶТ”