Яке аз самтҳои асосии фаъолияти Кумитаи меъморӣ ва сохтмони назди Ҳукумати Ҷумҳурии Тоҷикистон ин таъмини шаҳру ноҳияҳои ҷумҳурӣ бо нақшаҳои генералӣ ва нақшаҳои муфассали банақшагирии маҳал мебошад. Айни замон 65 маркази шаҳру ноҳияҳои ҷумҳурӣ пурра бо нақшаҳои генералӣ таъмин аст.

Дар ин бора Низом Мирзозода, раиси Кумитаи мазкур зимни нишасти хабарӣ иттилоъ дод.

Инчунин номбурда аз ҳодисаҳои нохуши зилзилавии дар Туркия ва Сурия рухдода, хотиррасон шуда, дар бораи зилзилатобоварии бинову иншоот зикр намуд: “Кумита бо мақсади баҳодиҳии риояи меъёру қоидаҳои шаҳрсозӣ, регламентҳои техникии сифати технологии корҳои сохтмонӣ, мавод ва маснуоти сохтмонӣ, инчунин дигар санадҳои қонунгузории шаҳрсозӣ дар бино ва иншоотҳои сохташаванда бо мақсади таъмини зилзилатобоварии бинову иншоотҳо, пас аз ҳодисаи дар давлатҳои Туркия ва Сурия рухдода, барои санҷиши мехсутуну асосҳои бино ва иншоотҳо дар шаҳру ноҳияҳои ҷумҳурӣ озмоишгоҳи махсусгардонидашуда бо таҷҳизоти муосири замонавии истеҳсоли Федератсияи Русия таъсис дод”.

Таъкид гардид, ки санҷиши мехсутунҳо дар майдони сохтмонӣ, тибқи талабот, тартиб ва меъёру қоидаҳои сохтмонӣ амалӣ карда мешавад. Мақсади асосии санҷиш ин муайян намудани қобилияти борбардории мехсутунҳо мебошад, ки баъди санҷиш бо натиҷаи ҳисоби конструктивӣ муқоиса карда мешавад.

Ф. САФАРОВА, “ҶТ”