Дар шаҳри Хуҷанд филми нави МД “Суғдсинамо” - “Паканаи айнакдор” ба намоиш гузошта шуд. Ин филм кӯдакона буда, аввалин филми миллӣ дар жанри тахаюлии кӯдакона маҳсуб меёбад.

Масъулини МД “Суғдсинамо” мегӯянд, ки дар заминаи дастгириҳои давлатӣ, бо истифода аз шароити мавҷуда мехоҳанд дар рушди синамои миллӣ саҳм гузоранд. Аз замони фаъолият то имрӯз аз ҷониби ин муассиса филмҳои хубу диданӣ рӯйи навор омада, пешниҳоди дӯсторони синамо гардида буд.

Филми “Паканаи айнакдор” аз рӯзгори қаҳрамоне бо номи Сиёвуш қисса мекунад, ки чӣ тавр навраси ҷуссааш хурду айнакдор боиси мазаммат ва таҳқири ҳамсинфони худ қарор мегирад. Сиёвуш, қаҳрамони марказӣ, ки аз таҳқиру табъизи ҳамсинфон азият мекашад, соҳиби гарданбанди сеҳрнок ва “Ҳафт хоҳиши амалишаванда” мегардад. Ба воситаи сеҳри гарданбанд яке аз ҳамсинфонашро ба гӯсфанд ва дигарашро ба паканаи айнакдор мубаддал мегардонад. Дар филм нишон дода мешавад, ки барои бекор кардани ҷоду Сиёвуш ҳамроҳи гӯсфанду ҳамсинфонаш бояд то ғуруби офтоб ба Ҳафткӯли пурасрор бираванд, вагарна гӯсфанд дигар одам намешавад ва Рустами қадбаланд барои ҳамеша пакана мемонад.

Ба таъкиди дастандаркорони филм дар “Паканаи айнакдор” мавзӯҳои буллинг дар мактаб, табъиз миёни наврасон, бетарафӣ ва масъулият, накӯкорӣ, дилсӯзӣ ва меҳрубонӣ, дӯстӣ ва рафоқат, якҷоя амал кардан, эҳтироми калонсолон, сайёҳӣ баррасӣ шудааст.

Ба таъкиди масъулони МД “Суғдсинамо” филми “Паканаи айнакдор” дар ҳамкорӣ бо мутахассисони ҷумҳурӣ танзим, рангпардозӣ, оҳангсозӣ, садогузорӣ шудааст. Чун ин филм аз нуқтаи назари жанр фентезӣ (тахайюлӣ) аст, он эффектҳои визуалии зиёд дорад.

Қобили зикр аст, ки нахустнамоиши филми “Паканаи айнакдор” санаи 10 декабри соли ҷорӣ дар кинотеатри “Ҷавонон” намоиш дода шуд.

Субҳиддин ҚОДИРОВ, “ҶТ”