Дирӯз, 28 феврал дастаи “Ҳосилот”-и Фархор дар доираи бозии ҷавобии даври плей-офи Ҷоми Конфедератсияи футболи Осиё (КФО) бо тими “Дордой”-и Қирғизистон бозиро мусовӣ 1-1 ба анҷом расонид ва аз роҳхати бозиҳои гурӯҳии Ҷоми КФО маҳрум гардид.

Ислом Шамсиев нимҳимоятгари дастаи “Дордой” дар дақиқаи 6-уми дидор ҳисоби бозиро кушод. Дар дақиқаҳои охири қисми дуюми бозӣ (90+1) Муҳаммадҷон Ҳасанов нимҳимоятгари дастаи “Ҳосилот” ҳисоби бозиро баробар намуд.



Сармураббии дастаи “Ҳосилот”-и Фархор Муҳаммадҷон Ҳабибулоев дар сӯҳбат бо хабарнигорон аз муҳофизон ва ҳамлагарони дастааш норозигӣ байён намуда иброз дошт, ки “Аввалан аз тамоми мухлисони даста узр мепурсам, ки вазифаи дар пеш гузоштаамонро иҷро карда натавонистем. Ростӣ, мо дар ин дидор интизор набудем, ки ҳариф инқадар зуд ба дарвозаи мо гол мезананд. Ҳимоятгари даста Мусо Содиқ дар бозии аввал корти сурх гирифт ва имрӯз ба даста кӯмак расонида натавонист. Аз ҳамин сабаб дар ин вохӯрӣ маҷбур шудем бо се муҳофизатгар ба майдон бароем. Дар чор бозие, ки мо баргузор намудем ягон ҳамлагари даста гол назад. Аз ин сабаб ман дар ин бозӣ аз хати ҳуҷум ва муҳофизат норозиам” афзуд,-Муҳаммадҷон Ҳабибулоев сармураббии дастаи “Ҳосилот”

Сармураббии дастаи “Дордой”-и Қирғизистон Мурат Ҷумъакев қайд намуд: “Вазифаи дар назди даста гузошта ба муваффақият ба анҷом расид ва моро дар пеш бозиҳои гурӯҳии Ҷоми КФО интизор аст”.

Ёдовар мешавем, ки бозии аввали даври плей-офи Ҷоми КФО миёни дастаҳои “Ҳосилот”– и Фархор ва “Дордой”-и Қирғизистон 21 феврал дар шаҳри Ош баргузор гардид. Дар ин дидор дастаи “Ҳосилот”  бо ҳисоби 1 - 0 бозиро бохт.

Бозиҳои гурӯҳии Ҷоми КФО рӯзи 14 март оғоз мегардад.

Қаҳрамони Тоҷикистон дастаи “Истиқлол”-и Душанбе дар гурӯҳи “Д” бо “Дордой”- Қирғизистон, “Алай”- Қирғизистон ва “Алтин Асур”- Туркманистон қувва меозмояд.

Бозиҳои гурӯҳи “Д” Ҷоми КФО

Даври 1                                   14-март (сешанбе)
“Истиқлол” (Тоҷикистон) - “Дордой” (Қирғизистон)
“Алай”(Қирғизистон) - “Алтин Асур” (Туркманистон)

Даври 2                                    4 апрел (сешанбе)
“Алтин Асур” (Туркманистон) - “Истиқлол” (Тоҷикистон)
“Дордой” (Қирғизистон) -“Алай”(Қирғизистон)

Даври 3                                     18 апрел (сешанбе)
“Истиқлол” (Тоҷикистон) -“Алай”(Қирғизистон)
“Дордой” (Қирғизистон - “Алтин Асур” (Туркманистон)

Даври 4                                      3 май (чоршанбе)
“Алай”(Қирғизистон) - “Истиқлол” (Тоҷикистон)
“Алтин Асур” (Туркманистон) - “Дордой” (Қирғизистон)

Даври 5                                      17 май (Чоршанбе)
“Дордой” (Қирғизистон) - “Истиқлол” (Тоҷикистон)
“Алтин Асур” (Туркманистон) - “Алай”(Қирғизистон)

Даври 6                                        31 май (Чоршанбе)
“Истиқлол” (Тоҷикистон) - “Алтин Асур” (Туркманистон)
“Алай”(Қирғизистон) - “Дордой” (Қирғизистон)