Шоми 5-уми апрел футболбозбонувони мунтахаби миллии Тоҷикистон дар нахустин бозиаш даври аввали марҳилаи интихобии мусобиқоти футболи бонувон барои Бозиҳои олимпӣ-2024 дар гурӯҳи “Е” аз мунтахаби Ҳонконг бо ҳисоби бузуги 0:3 шикаст хӯрд.

Дар ин бора Федератсияи футболи Тоҷикистон иттилоъ додааст.

Бино ба иттилои манбаъ бозии мазкур дар Варзишгоҳи марказии шаҳри Ҳисор доир гардида, барои дарёфти роҳхат ба даври баъдии мусобиқа ҳамаи мунтахабҳои гурӯҳи “Е” - Тоҷикистон, Филиппин, Ҳонконг ва Покистон мубориза мебаранд.

Бозии дигари ду дастаи гурӯҳи мазкур Филиппин ва Покистон низ доир шуда, ба нафъи мунтахаби Филиппин ба анҷом расид 4:0.

Гуфта мешавад, дар даври дуюми мусобиқа дар гурӯҳи “Е”, ки 8-уми апрел дар Варзишгоҳи марказии шаҳри Ҳисор баргузор мешавад, нахуст дастаи Покистон бо Ҳонконг, сипас мунтахаби Тоҷикистон бо Филиппин рақобат хоҳанд кард.

Яҳё МАҲМАДНАБИЕВ, “ҶТ”