Дар 19-уми Бозиҳои Осиё, ки аз 23 сентябр то 8 октябр дар Ҳангжоуи Чин баргузор мегардад, Ҷумҳурии Тоҷикистонро беш аз 100 варзишгар намояндагӣ мекунад. Дар ин хусус дафтари матбуотии Кумитаи миллии олимпии Тоҷикистон хабар медиҳад.

Бино ба иттилои манбаъ, кумитаи тадорукоти бозиҳо маълум намуд, ки 45 кумитаи миллии олимпии (КМО) узви Шурои олимпии Осиё беш аз 12 ҳазору 500 варзишгарро барои иштирок дар Бозиҳои 19-уми Осиё номнавис намудаанд.

Бояд гуфт, ки дар Бозиҳои 18-уми Осиё дар соли 2018 дар Ҷакарта ва Палембанги Индонезия 11 300 нафар сабти ном шуда буд.

Ба барномаи Бозиҳои Осиёи имсола 40 намуди варзиш, 61 ришта ва 483 мусобиқа шомил гардидаанд. Мусобиқаҳо дар 54 макони мусобиқа дар Ҳангжоу ва панҷ шаҳри музофоти Чжэтсзян баргузор мешаванд.

Баъзе омори иштирокчиён чунин аст:

-Ҳайати мунтахаби шаш кумитаи миллии олимпӣ, аз ҷумла Чин, Тайиланд, Ҷопон, Ҷумҳурии Корея, Ҳиндустон ва Ҳонконг аз 600 варзишгар зиёдтар аст.
Дар варзиши сабук варзишгарони 43 кумитаи миллии олимпӣ иштирок хоҳанд намуд.

11 намуди варзиш, аз ҷумла бокс, варзишҳои обӣ, тирандозӣ, вазнбардорӣ ва киберспорт беш аз 30 кумитаи миллии олимпиро ҷалб намудаанд.
Варзише, ки шумораи бештари варзишгаронро фаро гирифтааст, футбол мебошад.

Дар 11 намуди варзиш, аз ҷумла, варзиши сабук, варзишҳои обӣ ва шамшербозӣ зиёда аз 300 варзишгар ба қайд гирифта шудаанд.

Дар аввалин Бозиҳои Осиё, ки соли 1951 дар Деҳлии Ҳиндустон баргузор шуда буд, 11 кумитаи миллии олимпӣ бо 489 варзишгар иштирок намуда буданд.
Интизор меравад, ки дар Бозиҳои 19-уми Осиё дар Ҳангжоу шумораи рекордии варзишгарон иштирок намоянд.

Я . МАҲМАДНАБИЕВ, “ҶТ”