ВАРЗИШ
Душанбе 18 Ноябр 2019 06:21
6323

Дар доираи рубрикаи “Дар меҳмонии “Ҷавонони Тоҷикистон” тасмим гирифтем, ки бо Саидҷалол Саидов, паҳлавони шинохтаи кишвар саволҳои хонандагонро пешниҳод намоем.

Маликова Рухсора: Шумо ба тамошои филм рағбат доред? Агар дошта бошед худатонро боре шудааст, ки ҳунарманди соҳаи филмсозӣ тасаввур карда бошед? 

- На, ба тамошои филм чандон рағбат надорам. Асосан тамошои филм ин вазифаи модарони хонашин аст, ки ба ин кор машғул мешаванд. Намехоҳам вақтам беҳуда гузарад. Аз вақте ки ба тамошои филм сарф мешавад, беҳтараш тамрин кунам, худамро хубу роҳат ҳис мекунам.                                                                                                                                                                                                                                                   
Зоҳид Ҷумаев:  Аз ҳама зарбаи сахти хурдаатон дар зиндагӣ кадом аст? 
- Зарбаи сахти хӯрдаам соли 2011 буд, ки аввалин бор зонӯи поям ҷарроҳӣ шуд. Ин ҷарроҳӣ маро як солу се моҳ аз варзиш дур сохт. То ҳоло вақте ки ба ҷарроҳии поям бингарам аз варзиш дур шуданам ба хотирам мерасад.

Гулмаҳмадзода Меҳрона: Орзуи  бо духтари варзишгар оила бунёд карданро фикр кардаед? 
- Интихоби нодурусти ҳамсар боиси ноумедиҳову дилсардиҳо хоҳад гашт. Интихоби ҳамсар монанди харидани либос осон нест. Мо мехоҳем умре бо ӯ зиндагӣ кунем ва ӯро маҳрами рози худ қарор диҳем. Ҳар як ҷавонписар мехоҳад ҳамроҳи  ҳамсафари ҳаётиаш беҳтарин рӯзҳои хушбахтиро паси сар созад. Шахсан ман ҳеҷ вақт фикри инро надоштам, ки бояд бо духтари варзишгар оила бунёд кунам. 

Рофизода Умедҷон: Саидҷалол айни ҳол ба вуҷуд доштани дӯсти ҷонӣ бовар дорад ва чӣ гуна шахсро дӯсти ҷонӣ қабул кардан мумкин аст? 
- Ба фикри ман дӯсти ҳақиқӣ ҳамеша мекушад, ки шодишарик ва ғамшарики рафиқи худ бошад, хотири болидаашро боз болидатар намояд, танҳо манзили дӯсти худро ободу дили ӯро шод гардонад. Дӯсти ҷонӣ ҳамон нафаре мебошад, ки ростқавл ва поквиҷдон бошад. Дӯсти ҷонии ман Муҳаммад Абдураҳмонов мебошад, ки дар ҳама ҳолат дар бари ман аст. Ман ба ӯ сахт бовару эътимод дорам. Ва боварӣ дорам, ки дӯстии мо то охирон нафасамон боқӣ хоҳад монд.

Рамазон Усмонов: Аз дастгирии молиявии Ҳукумати кишвар нисбати  варзишгарон шумо қаноатманд ҳастед? 
- Албатта. Имрӯзҳо Асосгузори сулҳу ваҳдати миллӣ – Пешвои муаззами миллат муҳтарам Эмомалӣ Раҳмон ба соҳаи варзиш ва ба мо варзишгарон таваҷҷуҳи хосса зоҳир менамояд. Ҳамин ғамхориҳои падаронаи Пешвои миллатамон ҳаст, ки мо варзишгарон дар ҳама мусобиқаҳои сатҳи ҷаҳонӣ сабқат намуда, номи миллати тоҷикро бори дигар дар арсаи ҷаҳонӣ муаррифӣ месозем. Мо - ҷавонон бояд шукронаи онро намоем, ки дар меҳвари сиёсати Ҳукумати кишвар қарор дошта, ҳамаҷониба  дастгирӣ меёбем. Новобаста аз варзишгар будан, бояд ҳар як шахси солимфикр шукронаи онро кунад, ки дар фазои сулҳу субот ва дар Тоҷикистони биҳиштосо умр ба сар бурда истодааст. 

Дилноза Мирзоева: Кадом мусобиқаатон Шуморо дар байни ҳамагон муаррифӣ сохт?
- Ман ҳамасола дар мусобиқаҳои  гӯштини миллӣ дар ҷашни Наврӯз,  ки дар минтақаҳои кишвар барпо мегардад, мухлисони худро пайдо мекунам. Ба фикрам иштирок дар мусобиқаҳои гӯштини миллӣ маро миёни мардум муаррифӣ сохт.

Акобир Шарипов: Агар Саидҷалол варзишгар намебуд, имруз чи касбро интихоб мекард? 
- Ман ба ғайри варзиш дигар касбро ҳеҷ вақт интихоб накардаам. Агар варзишгар намебудам тамоми кӯшишро ба харҷ медодам, то сазовори номи варзишгар бошам ва муаррифгари кишварам дар байни дигар давлатҳо. Баъди ба анҷом расонидани варзиш боз мехостам дар соҳаи варзиш касби худро идома диҳам. Ҳамчун мураббӣ  ҷавонон ва наврасонро аз риштаи гӯштини миллӣ ва нозукиҳои он бархурдор намоям. 

Элмурод Маҳмуродзода: Аввалин мусобиқаи хориҷ аз кишвар иштирок намудаатон  кадом аст ва рақиби аввалини худро дар хотир доред? 
- Аввалин мусобиқаи ман берун аз кишвар соли 2004 дар шаҳри Тошканди давлати Ӯзбекистон доир гардида буд. Рақиби ман дар ин сабқат мизбон аз Ӯзбекистон Сунатулло Давлатов буд.

Ҷонона Рустамова: Шумо мехоҳед, ки дар оянда фарзандатон ба монанди Шумо варзишгар шавад? 
- Бале, ман  бисёр мехоҳам ва дар пеш ҳам мақсад дорам, ки фарзандамро чун давомдиҳандаи касби хеш ба воя расонам. Бо амри Худованд ба ин натиҷа мерасам. Боварӣ дорам, ки фарзандам дар оянда парчамбардор хоҳад шуд.

Таманно Исматова: Саидҷалол дар зиндаги аз чӣ метарсад?  
- Зиндагӣ ин худ майдони мубориза аст. Ман дар зиндагӣ аз Худованди бузург метарсам.

Умед Сайфуллоев: Аввалин устоди Шумо дар ҷодаи варзиш кӣ буд? 
- Устод ин омӯзандаи роҳу равиши шогирд дар ҳаёташ ба ҳисоб меравад. Аввалин устоди ман Салимҷон Ахмедов мебошад, ки ман аз соли 2002  вақте  аввалин бор ба тамрин машғул шудам усулҳои варзишиширо аз ӯ омӯхтам ва то соли 2008 дар назди ӯ тамрин намудам. 

Амонбек Тулегов: Агар ба шумо як бори дигар фурсати интихоби касб даст диҳад, кадом касбро интихоб мекардед? 
- Варзиш гараваи саломатӣ буда, шахси ба он машғулшударо метавонад, ҳама вақт солиму ҷавон нигоҳ дорад. Варзиш ин худ як роҳи расидан ба сулҳу ваҳдат ва дӯстии байни ҷавонон ба шумор меравад. Агар барои ман бори дигар фурсати касб интихоб кардан бошад, ман бе ягон мамоният соҳаи варзишро интихоб мекардам. Ба ғайр аз варзиш ман касби дӯстдоштае барои интихоб кардан надоштам ва нахоҳам дошт.

Таманно Исматова: Боре шудааст, ки ҳангоми муноқиша дар ҳаёти шахсиатон аз усули варзишиатон истифода бурда бошед, агар бошад ба ин савол равшанӣ андозед?
- Ёд надорам вақтеро ки ба муноқиша вохӯрда бошам. Ман то имрӯз ҳама заҳмату талошҳоямро дар вақти тамринҳоям ба ҷо овардаам, то нозукиҳои усулҳои варзиширо ҳаматарафа аз худ кунам ва ҳангоми сабқатам ба  муқобили ҳарифам ба кор бурда тавонам. Усулҳои варзишии ман танҳо барои ҳарифонам аст. Ман берун аз сабқатам ҳеҷ гоҳ ин корро накардаам ва намекунам. 

Соҳибназар Саидов: Саидҷалол чанд шогирд тарбия карда истодааст?
- Ман худам то ҳол ба мураббӣ ниёз дорам. Мехоҳам ҳамарӯза маро устодони беҳтарин ба шогирдӣ қабул карда, аз нозукиҳои тозаи гӯштин бархурдор намоянд. То ҳол шогирде дар ҷодаи гӯштин тарбия накардаам. Аммо кӯшиш мекунам, ки дар оянда шогирдоне тарбия намоям, ки номбардори миллату давлат бошанд. 

Таҳияи Малоҳат 
ХОЛМУРОДОВА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1

Ноябр 2019 c.