Дар Ҷоми кушоди Осиё оид ба ҷудо миёни наврасону ҷавонон, ки аз 27 –ум то 30–юми июл дар шаҳри Тошканди Узбекистон доир гардид, ҷудокорони кишвар ба гирифтани 7 медал мушарраф гардиданд. Дар ин бора сомонаи ТВ “Варзиш” хабар медиҳад.

Бино ба иттилои манбаъ, дар мусобиқа миёни наврасон 86 варзишгар аз 4 давлат ва миёни ҷавонон 97 варзишгар аз 3 давлат ширкат карданд.

Федератсияи ҷудои Тоҷикистон миёни наврасон 33 варзишгар ва миёни ҷавонон 49 варзишгарро ба шаҳри Тошканд сафарбар карда буд. Мусобиқа тибқи қоидаҳои Федератсияи байналмилалии ҷудо аз рӯи 16 вазн миёни наврасон (8 вазн – писарон, 8 вазн - духтарон) ва 14 вазн миёни ҷавонон (7 вазн – писарон, 7 вазн - духтарон) баргузор гардид.

Ҷудокорони тоҷик мусобиқаи мазкурро бо 7 медал ( 1 тилло, 6 биринҷӣ) ба анҷом расониданд. Ягона нишони тиллоро барои Тоҷикистон дар мусобиқа Абубакр Шеров зери вазни то 73 кг ба даст овард. Аҳлия Муъминов (-52кг), Фазлиддин Садриддинзода (-66кг), Илҳомиддин Ҷабборов (-73кг), Сайфиддин Сайфиддинзода (-81кг), Умедҷон Раҷабов (-90кг) ва Ҳабибулло Ашӯров (-100кг) соҳиби нишонҳои биринҷӣ гардиданд.

Парвиз Абдураҳмонов дар вазни -100кг ва Иброҳимҷон Элмуродов дар вазни +100кг ба мақоми панҷуми мусобиқа қаноат намуданд.

Я. МАҲМАДНАБИЕВ, “ҶТ”