Шоми имрӯз, 17 апрел соати 22:00 дастаи мунтахаби наврасони то 17-солаи Тоҷикистон оид ба футбол, ки дар Ҷоми Осиё-2025 дар Арабистони Саудӣ баромади арзандаву таърихӣ карданд, ба Ватан баргаштанд.

Дар ин бора аз маркази таҳлил ва иттилооти Кумитаи кор бо ҷавонон ва варзиш хабар доданд.

Тибқи иттилоъ, дастаи мунтахаби футболбозони навраси кишварро дар Фурудгоҳи байналмилалии шаҳри Душанбе Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Дилбар Одилзода, муовини раиси шаҳри Душанбе, мухлисону дӯстдорони футболи меҳан ва дигар масъулини соҳаи варзиши мамлакат бо шукӯҳу шаҳомати хосса истиқбол гирифтанд.

Хотирнишон месозем, ки дастаи мунтахаби наврасони то 17-солаи Тоҷикистон дар Ҷоми Осиё-2025 дар Арабистони Саудӣ чаҳор бозӣ доир кард. Дар марҳилаи гурӯҳии мусобиқот мунтахаби то 17-солаи кишвар ба дастаҳои мунтахаби наврасони Уммон бо ҳисоби 2:1 ва Эрон бо ҳисоби 3:1 ғалаба кард. Аз дастаи мунтахаби наврасони Кореяи Шимолӣ бошад, бо ҳисоби 0:3 мувоҷҷеҳи шикаст шуд.

Дастаи мунтахаби наврасони то 17-солаи Тоҷикистон зери раҳбарии сармураббӣ Марко Раҷини, мутахассиси итолиёӣ дар гурӯҳи “D” бо 6 имтиёз мақоми аввалро соҳиб шуда, ба даври чорякниҳоии Ҷоми Осиё роҳ ёфт ва соҳиби роҳхат ба Ҷоми ҷаҳон-2025 гардид, ки моҳи ноябри соли 2025 дар Қатар доир хоҳад шуд.

Ёдовар мешавем, ки мунтахаби наврасони Тоҷикистон (U-17) бори сеюм дар таърихи худ ба қисми ниҳоии мусобиқоти қаҳрамонии ҷаҳон роҳ ёфт. Қаблан наврасони тоҷик дар Ҷоми ҷаҳон дар Кореяи Ҷанубӣ (соли 2007) ва Бразилия (соли 2019) ширкат кардааст.