Аз 1 то 3 апрели соли равон дар шаҳри Анталияи Туркия мусобиқаи гуштини дзюдо “Antalya Grand Slam – 2022” баргузор мешавад, ки дар он 8 варзишгари тоҷик маҳорати худро нишон хоҳанд дод.

Дар ин бора Федератсияи дзюдои Тоҷикистон хабар медиҳад. Интизор меравад, ки дар ин мусобиқа 535 варзишгар аз 65 кишвари ҷаҳон ширкат кунан, ки дар миён 8 варзишгари тоҷик низ шомил аст.

Мусобиқа тибқи муқаррароти Федератсияи байналмилалии дзюдо дар 7 вазн миёни мардон ва 7 вазн миёни занон баргузор мешавад. Ғолибону ҷоизадорон дар баробари медалҳо бо ҷоизаҳои пулӣ - барои ҷои аввал 5 ҳазор евро, барои ҷои дуюм 3 ҳазор евро ва барои ҷои сеюм 1500 евро сарфароз хоҳанд шуд.

Хотиррасон мекунем, ки аз Тоҷикистон Меҳрзод Сӯфиев (60 кг), Абубакр Шеров (66 кг), Шаҳбоз Саидаброров (66 кг), Сомон Маҳмадбеков (73 кг), Комроншоҳ Устопирён (90 кг), Ҷаҳонгир Маҷидов (90 кг), Абубакри Акобир (100 кг) ва Темур Раҳимов (100 кг) баромад мекунанд.

Зуҳро РИЗОЗОДА, коромӯзи “ҶТ”