11-уми сентябр дар доираи сафари кории Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Ховалинг бо иштироки Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати кишвар ва муовини раиси вилояти Хатлон Мирзозода Музаффар дар ҷамоати деҳоти Лоҳутӣ майдончаи варзишии хурди болопӯшида мавриди истифода қарор гирифт.

Иншооти мазкур бо иқдоми соҳибкори ватанӣ Ҳасанов Абдулло бунёд ёфта, барои амалисозии он зиёда аз 1,1 миллион сомонӣ равона карда шудааст.

Майдонча дар маҳаллаҳои Токак ва Даҳани Шоли ҷамоати деҳоти Лоҳутӣ ҷойгир буда, дар рафти корҳои сохтмонӣ беш аз 20 нафар сокинон бо ҷойи кори муваққатӣ ва маоши муносиб таъмин шуданд.

Зимни ифтитоҳи иншоот раиси Кумита аз саҳми соҳибкори маҳаллӣ дар рушди соҳаи варзиш изҳори миннатдорӣ карда, таъкид намуд, ки таҳкими тарзи ҳаёти солим, фароҳам овардани шароити мусоид барои варзишгарон ва ҷалби ҷавонон ба варзиш аз самтҳои муҳими сиёсати иҷтимоии давлат ва Ҳукумати Ҷумҳурии Тоҷикистон маҳсуб меёбад.

Бо ба истифода дода шудани ин майдонча наврасону ҷавонони маҳаллу ҷамоати мазкур имкони фароҳам ёфтанд, ки вақти холигии худро дар муҳити солиму созанда сипарӣ намуда, ба машғулиятҳои гуногуни варзишӣ ҷалб шаванд.