Федератсияи футболи Тоҷикистон Милош Костич ¬- мутахассиси 52-солаи словениро сармураббии дастаи мунтахаби футболи ҷавонони Тоҷикистон (U-20) ва Марко Раджини - мутахассиси 56-солаи итолёвиро сармураббии дастаи мунтахаби футболи ҷавонони Тоҷикистон (U-17) таъйин кард. Дар ин бора саҳифаи расмии Федератсияи футболи Тоҷикистон хабар дод.

Ба иттилои манбаъ, ин ду мураббӣ бояд дастаҳоро ба марҳалаи интихобии Ҷоми Осиё-2025, ки моҳҳои сентябр ва октябри соли ҷорӣ баргузор мешавад, омода кунанд.

Костич чандин сол сармураббии дастаҳои наврасон (U-17) ва ҷавонони (U-19) Словения буд. Ӯ, ҳамчунин, бошгоҳҳои “Срвена Звезда” (Сербия), “Железничар” (Босния ва Ҳерсеговина), “Ахарнаикос”, “Ираклис”, “Трикала” (ҳама аз Юнон), “Люфтетари” (Албания) ва “Сент-Трюден” (Белгия)-ро роҳбарӣ кардааст.

Мутахассиси 52-солаи словенӣ Милош Костич дорои иҷозатномаи мураббигии дараҷаи “Pro”-и УЕФА мебошад.

Марко Раджини таҷрибаи сармураббигӣ дар дастаҳои Итолёвӣ ва Сан-Мариниро дорад. Оғози карйераи мураббигиаш дар Сан-Марино оғоз шудааст. Ӯ солиёни зиёд дар дастаҳои наврасону ҷавонони Сан-Марино ба ҳайси мураббӣ кор кардааст. Аз тарҷумаи ҳолаш бармеояд, ки Раджини чандин сол дар дастаҳои футболи Шветсария ҳам фаъолият намудааст. Ӯ ба ҳайси ёвари сармураббӣ дар дастаҳои “Кяссо”, “Билленсоне” ва ба ҳайси сармураббӣ дар дастаи “Локарно”-и Шветсария, ҳамчунин, дар кишварҳои Литва, Конго, Нигерия, Муғулистон ва Малайзия кор кардааст.

Аз соли 2023 Раджини директори техникии Академияи “Ювентус” дар шаҳри Душанбе ва мушовири техникии Федератсияи футболи Тоҷикистон буд.

Мутахассиси 56-солаи итолиёвӣ Марко Раджини низ дорои иҷозатномаи мураббигии дараҷаи “Pro”-и УЕФА мебошад.