Аз 15-уми апрел то 3-юми май дар пойтахти давлати Қатар шаҳри Доҳа марҳилаи ниҳоии мусобиқаи Ҷоми Осиё – 2024 байни дастаҳои футболи то 23-сола баргузор хоҳад гашт. Дастаи мунтахаби олимпии Тоҷикистон (U-23) таҳти роҳбарии Мубин Эргашев дар ин мусобиқаи сатҳи қоравӣ дар гурӯҳи “C” бо дастаҳои Арабистони Саудӣ, Ироқ ва Тайланд қарор гирифтааст. Дастаи мунтахаби мо дар охирин сабқати марҳилаи интихобии Ҷоми Осиё – 2024 рӯзи 12 сентябри соли 2023 бо ҳамтоёни худ аз Австралия мусовӣ карда, ба даври ниҳоӣ роҳхат ба даст овард. Айни замон мунтахаби олимпии кишвар барои иштирок дар марҳилаи ниҳоии сабқати мазкур омодагӣ дида истодааст. Бо мақсади огаҳӣ ёфтан аз рафти омодагиҳо, нақшаҳои роҳбарият ва футболбозони тими олимпӣ суҳбате анҷом додем бо Мубин Эргашев, сармураббии даста.

- Сараввал мегуфтед, ки айни замон тамринҳои дастаи олимпии кишвар дар куҷо ҷараён доранд?

- Айни замон ҳама бозингарон дар дастаҳои худ қарор доранд. Онҳо тамринҳоро дар дастаҳои худ идома дода истодаанд. Ҳар як футболбоз барои иштирок дар Ҷоми Осиё – 2024 омодагӣ дида, барои иштироки сазовор дар ин чорабинии сатҳи қоравӣ талош карда истодаанд.

- Тоҷикистон дар марҳилаи ниҳоӣ бо давлатҳое дар як гурӯҳ қарор гирифтааст, ки футбол дар онҳо хеле тараққӣ кардааст. Ба андешаи шумо тими миллии олимпии мо то кадом андоза шонси аз гурӯҳ баромаданро дорад ва дар гурӯҳ кадом даста барои Тоҷикистон бештар хавфнок аст?

- Мо дар марҳилаи ниҳоии Ҷоми Осиё - 2024 қарор дорем. Дар ин ҷо ҳамаи дастаҳо пурқувватанд. Ба қавле дар ин марҳила пайдо намудани дастаи тасодуфӣ ғайриимкон аст. Ҳар як даста бо заҳмату талош ба ин марҳила роҳ ёфтааст. Рақобат дар ин марҳила барои ҳеҷ дастае осон нахоҳад буд. Ин нуктаро мо дар бозиҳои Ҷоми Осиё - 2023 дидем. Ин мусобиқа нишон дод, ки ҳатто баъзе дастаҳои заиф низ метавонанд, барои дастаҳои пурқудрат ва сатҳи баланди футболдошта мушкили зиёд ба бор оваранд. Бинобар ин, мо ҳеҷ яке аз рақибони худро бо чашми кам намебинем. Ба ҳама рақибони худ бо эҳтиром муносибат мекунем ва ба онҳо кам баҳо намедиҳем. Дар муқобили ҳар яке аз онҳо бо ҷиддияти том рақобат хоҳем кард.

- Омодагиҳо барои иштирок дар марҳилаи ниҳоии Ҷоми Осиё – 2024 чӣ гуна ҷараён дорад?

- Омодагиҳои мо барои иштирок дар марҳилаи ниҳоии мусобиқаи Ҷоми Осиё - 2024 ба хубӣ ҷараён гирифта истодааст. Ҳамаи тайёриҳо аз рӯи нақша амалӣ шуда, кӯшиш дорем, то ба мусобиқаи мазкур бо омодагии комил раҳсипор гардем.

- Футболбозони мо то кадом андоза барои иштирок дар сабқати мазкур омодаанд?

- Тими мо маротибаи дуюм аст, ки пайиҳам ба марҳилаи ниҳоии Ҷоми Осиё роҳ ёфта истодааст. Айни замон дастаи олимпии кишвар дар гурӯҳе қарор дорад, ки рақибони он аз ҳар ҷиҳат пурқувватанд. Баъзе аз коршиносон аллакай пешгӯиҳои худро нисбати ин сабқати қоравӣ баён карда, гурӯҳи мазкурро "гурӯҳи марг" номидаанд. Вале бо ин ҳама мешавад бо онҳо рақобат кард ва имтиёз ба даст овард. Ин чизро мо дар сабқатҳои тими мунтахаби миллиамон дар Ҷоми Осиё - 2023 мушоҳида кардем. Онҳо ба мо нишон доданд, ки рақиб ҳар қадар пурқувват бошад ҳам, боварӣ ва эътимод нисбати худ метавонад, моро ба мубориза ва пирӯзӣ барад. Бинобар ин, мо то охир барои ғалаба ва касби имтиёз мубориза хоҳем бурд.

- Чуноне дар боло қайд карде д, мунтахаби Тоҷикистон дар ин мусобиқа таҷрибаи камтар дорад. Оё ин ба тими мунтахаб мушкилӣ намеорад?

- Бисёре аз бозингарони мо бо тими мунтахаби миллӣ дар Ҷоми Осиё – 2023 иштирок доштанд. Ин сабқат боис бар он гашт, ки мо бо маҳорати футболбозони дигар давлатҳо аз наздик шинос шавем. Ин барои футболбозони мо фоидаовар буд. Дар баробари ин, мо якчанд мусобиқоти санҷиширо низ пеш аз оғози Ҷоми Осиё - 2024 баргузор кардем. Аз он ҷумла, моҳи ноябри соли гузашта бо тимҳои олимпии Аморати Муттаҳидаи Араб, Қувайт дар Дубай ва пас аз он 2 бозӣ бо тими олимпии Чин дар кишвари Чин гузаронидем. Моҳи январи имсол бошад, 3 бозӣ дар шаҳри Анталияи Туркия гузаронида, натиҷаҳои назаррасро ба даст овардем. Ин мусобиқот низ барои мо таҷриба гашт. Бинобар ин, фикр мекунам, ки иштироки камтар дар Ҷоми Осиё барои мо он қадар мушкилсоз нахоҳад буд, зеро бисёре аз футболбозони мо таҷрибаи бозӣ дар сабқатҳои байналмилалиро доранд. Ин метавонад барои онҳо нақши муҳимро бозад. Онҳо бо иштирок дар чунин мусобиқот аллакай таҷрибаи заруриро барои ширкат дар дилхоҳ мусобиқа ба даст оварданд. Ягона мушкилии мо дар он аст, ки марҳилаи ниҳоии Ҷоми Осиё - 2024 дар рӯзҳои Фифа баргузор намешавад. Ин метавонад ба он сабаб гардад, ки баъзе аз дастаҳо бозингарони худро барои иштирок дар Ҷоми Осиё - 2024 ҷавоб надиҳанд.

- Тими мунтахаби Тоҷикистон дар Ҷоми Осиё – 2023 ҳунарнамоии хубе анҷом дод. Оё метавон ин ҳунарнамоиро аз мунтахаби олимпии кишвар интизор шуд?

- Ин футбол аст. Чизеро дар он пешгӯӣ карда намешавад. Аммо бояд як чизро қайд намоям, ки мо то охир мубориза хоҳем бурд ва дар ҳар як мусобиқа баҳри пирӯзӣ талош мекунем.

Ҳамчунин, бо истифода аз фурсати муносиб мехоҳам тамоми мардуми тоҷик ва мухлисони футболи меҳанро бо беҳтарин ҳунарнамоии тими миллиамон дар Ҷоми Осиё - 2023 табрик намоям. Зеро ин дастоварди бузурге дар таърихи футболи тоҷик маҳсуб меёбад. Футболбозони мо, новобаста аз он ки бори аввал иштирокчии ин мусобиқа буданд, дар Қатар ҳунарнамоии олиеро нишон дода, то ба даври 1/4 ниҳоӣ рафтанд. Ин натиҷа барои иштироки бори аввал натиҷаи хеле назаррас аст.

Ҳошим РАҲМАТУЛЛОЕВ “ҶТ”