"Истиқлол"-и Душанбе ва "Регар-ТадАЗ"-и Турсунзода аз гурӯҳи “Б”, “Куктош”-и ноҳияи Рӯдакӣ ва “Равшан”-и Кӯлоб аз гурӯҳи “А” ба даври нимфинали Ҷоми ФФТ-2017 роҳхат гирифтанд.

"Истиқлол" дар даври дуюми бозиҳои гурӯҳи "Б" бар дастаи "Ашт" бо ҳисоби 14:1 ғалаба кард. Дилшод Восиев дар ин вохӯрӣ 6 гол зад. Ҷаҳонгир Эргашев 3 гол, Ромиш Ҷалилову Дмитрий Барков дуголӣ, Фатҳулло Фатҳуллоев як гол заданд.

Дар бозии дигар "Регар-ТадАЗ" ба даврозаи "Ҳулбук" 5 голи беҷавоб зад. Голҳоро Евгений Хотимский, Давронҷон Тухтасунов, Азиз Мансуров, Ҳикматулло Расулов ва Шерзод Муҳаммадиев ба ҳадаф расонданд.
Ҳамин тариқ, баъд аз ду ғалаба "Истиқлол" ва "Регар-ТадАЗ" баромаданашонро ба даври нимфинал таъмин карданд.

14 феврал дар гурӯҳи “Б” “Истиқлол” бар “Ҳулбук” бо ҳисоби 11:0 ва “Регар-ТадАЗ” бар “Ашт” бо ҳисоби 6:2 ғалаба карда буданд.

15 феврал дар гурӯҳи "А" "Равшан"-и Кӯлоб дастаи "Куктош"-ро бо ҳисоби 1:0 шикаст дод. Бозӣ миёни дастаҳои "Хуҷанд" - "Ҳосилот" мусовӣ - 1:1 - анҷом ёфт.

Дар даври сеюм, дар гурӯҳи "А", ки 17 феврал доир гашт, "Куктош" бар "Ҳосилот" бо ҳисоби 3:2 ғалаба кард. Бозӣ миёни дастаҳои «Равшан» – «Хуҷанд» мусовӣ - 0:0 анҷом ёфт.

Дар гурӯҳи «Б» бошад, ки 18 феврал баргузор шуд, "Ҳулбук" бар "Ашт" бо ҳисоби 8:4, "Истиқлол" бар "Регар-ТадАЗ" бо ҳисоби 4:2 ғалаба карданд.

Дар даври нимфинал, ки бо сабаби боришоти зиёди барф аз 20 феврал ба 22 феврал гузаронида шуд, “Истиқлол” бо “Равшан”, “Куктош” бо “Регар-ТадАЗ” вомехуранд. Бозӣ барои ҷои сеюм ва финал 24 феврал баргузор мешавад.