Дар зери сиёсати варзишпарваронаи Пешвои миллат муҳтарам Эмомалӣ Раҳмон тамоми соҳаҳои ҳаётан муҳим рӯз аз рӯз пеш рафта истодаанд. Соҳаи варзиш низ чун як соҳаи муҳим барои солимии ҷомеа зери ин сиёсати хирадмандона дар давоми солҳои соҳибистиқлолӣ рушди рӯзафзун дорад. Ва ҳамин аст, ки давра ба давра варзишгарони кишвар дар мусобиқаҳои сатҳи минтақавию ҷаҳонӣ соҳиби ҷойҳои ифтихорӣ мегарданд. Бахшида ба Рӯзи варзишгарон, ки ҳамасола 10 август дар саросари кишвар таҷлил мегардад, аз чанд мутахассиси соҳа доир ба таҷлили ботантанаи ин ҷашн ва таъсири он ба рушди минбаъдаи варзиш пурсон шудем.

Устопир Устопиров, 
мураббии шоистаи варзиши Тоҷикистон

Кумитаи кор бо ҷавонон ва варзиши назди Ҳукумати Ҷумҳурии Тоҷикистон имсол беҳтарин иқдомро роҳандозӣ карда истодааст. Ҳамасола 10 август тибқи қонуни ҶТ “Дар бораи рӯзҳои ид” дар кишварамон Рӯзи варзишгарон ҷашн гирифта мешавад. Ҳама гуна кӯшишу иқдомҳое, ки аз ҷониби Ҳукумати кишвар роҳандозӣ карда мешавад, албатта ба рушди соҳаи варзиш натиҷаи дилхоҳ медиҳад. Муаррифӣ намудани варзишгарони беҳтарин тариқи оинаи нилгун, намоиш додани баромадҳои онҳо, сохтани роликҳо бо сурудҳои ватанпарварона дар рафти таҷлили Рӯзи варзишгарон дар байни ҷавонон хело муҳим аст. Дар сатҳи баланд таҷлил намудани ин ҷашн боиси ҳавасмандгардонии варзишгарон мегардад. Меҳри онҳо ба варзиш ва ҳисси ватанпарвариву номуси ватандориашон зиёд мегардад.  
 
Умаралӣ Сафаралӣ, сухангӯи Кумитаи миллии олимпии Ҷумҳурии Тоҷикистон

Таҷлили ҳар гуна ҷашну ташкил кардани чорабиниҳо аз рушди ин ё он соҳа дарак медиҳад. Хушбахтона, дар фазои сулҳу осоиштагии кишвар ва зери сиёсати варзишпарваронаи Пешвои миллат, Президенти ҷумҳурӣ, Президенти Кумитаи миллии олимпии кишвар, муҳтарам Эмомалӣ Раҳмон соҳаи варзиш низ сол то сол тараққӣ меёбад ва варзишгарони тоҷик дар арсаи байналмилалӣ ба гирифтани ҷойҳои намоён даст меёбанд.

Албатта, таҷлили Рӯзи варзишгарон рӯҳияи варзишгаронро боз ҳам баланд мебардорад ва онҳо барои муаррифии арзандатари кишварамон дар ҷаҳон бештар талош мекунанд. Ин амал, ҳамчунин боиси ҷалби наврасону ҷавонон ба варзиш мегардад. Ба варзиш ва тарбияи ҷисмонӣ машғул шудани аҳолӣ бошад, солимии ҷомеаро ба бор меорад.

Али Шариф, шореҳи варзиш

Дар сатҳи баланд таҷлил намудани Рӯзи варзишгарон эътимоди онҳоро ба фардои дурахшони варзиши меҳан афзун менамояд. Ва баъдан ҳар қадаре, ки тавваҷӯҳи масъулин ба варзишгарон бештар бошад, ҳамон қадар масъулияти аъзоёни тимҳои кишвар барои муаррифии ватани маҳбуби мо ва дастовардҳои шоён бештар мегардад. Дар ин раванд кор ҳамеша муътадил ҷараён гирифта, иллатҳои мавҷуда бартараф карда мешаванд. Аз ҳолу аҳволи варзишгарон хабардор будан, бунёди заминаи устувори комёбиҳо ва рӯҳияи шикастнопазири ҳар яки онҳоро дар мусобиқоти сатҳи байналмилалӣ ба вуҷуд меоварад, ки ин маҳаки асосии ҳар як нафари узви мунтахабҳои мамлакат ба шумор меравад. Ин афрод бо чунин муносибат ҳамеша ниёз доранд.

Ин тадбир дар ниҳоди насли варзишдӯсти кишвар боз шуълаи умедвориҳоро дучанд менамояд. Боз дафъатан наврасону ҷавонон варзишро ҳамчун омили саломатӣ ва муаррифии ватану меҳан дар арсаи ҷаҳонӣ эътироф менамояд ва бо тарбияи ҷисмонӣ ва варзиш шуғли бештар хоҳанд намуд. Дар ниҳоят матлаби мо ҳам бо чунин василаҳои муҳими рушдёбии варзиш амалӣ хоҳад гашт. Ин албатта ҷоизаҳои асосии Бозиҳои олимпӣ, дастовардҳои мусобиқоти қаҳрамонии ҷаҳон ва осиёӣ оид ба намудҳои мухталифи варзиш маҳсуб меёбад.  

Саидҷалол Саидов, 
варзишгар

Қаблан мехостам изҳори сипосу миннатдории худро ба роҳбари кишвар Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ҳамзамон Президенти Кумитаи миллии олимпии Тоҷикистон ҳастанд ба хотири тавваҷӯҳ ва ғамхориҳояшон нисбат ба варзишгарони кишвар расонида бошам. Албатта ҳар як иқдоме, ки дар самти варзиши кишвар ва ба хотири дастгирии варзишгарон гирифта мешавад, барои фаъолияти минбаъдаи мо як такони ҷиддӣ медиҳад. Чи тавре, ки мову шумо огоҳ ҳастем Кумитаи кор бо ҷавонон ва варзиш иқдом гирифтааст, ки бахшида ба Рӯзи варзишгарон чорабиниҳое зиёдеро роҳандозӣ кунад ва онро дар сатҳи баланд таҷлил намояд. Албатта ин иқдоми хуб ва саривақтӣ мебошад, ки метавонад пеш аз ҳама дӯстии варзишгарони тамоми манотиқи кишварро қавӣ гардонад. Ва баъдан таҷлили Рӯзи варзишгарон метавонад, барои рӯҳбаланд гардидану саъю талош намудани варзишгарон баҳри ба даст овардани дастовардҳои нав ба нав ва муаррифӣ намудани Тоҷикистон дар арсаи ҷаҳонӣ гардад. Ин иқдом як таваҷҷӯҳи махсус аст ба мо варзишгарон ва ҳар яки мо дарк менамоем, ки рӯз то рӯз дар кишвари мо дастгириҳо дар самти варзиш зиёд шуда истодааст. Маҳз ҳамин гуна иқдомҳо ва дастгириҳо сабаб мешаванд, ки варзишгарон ба ояндаи худ ва ояндаи варзиши кишвар ҷиддӣ назар намуда, бо заҳматҳои пайвастаи худ дар муаррифии ватани маҳбубамон саҳмгузор бошанд.
  
Муродалӣ Тешаев, 
корманди ТВ “Варзиш”

Ҷашн гирифтани ин ид иқдоми хело хуб аст. Ҳамасола Рӯзи варзишгарон  ба таври муқаррарӣ ҷашн гирифта мешавад, то ҳол ман доир ба таҷлили ин ҷашн навигарӣ мушоҳида накардаам. Агар имсол бо ташабуси Кумита ин ҷашн дар сатҳи баланд баргузор гардад, ба ояндаи варзиши Тоҷикистон таъсири муҳими худро мерасонад. Зеро ботантана таҷлили ин ид дар замири ҳар як варзишгар ҳисси баланди варзиширо бедор мекунад. Варзишгарон баъди таҷлил шояд боз ҳавасмандиашон васеъ гардад ва майлу рағбаташон ба варзиш зиёд шавад.

Бахтиёр Донаёров, 
варзишгар 

Тарғибу ташвиқи тарзи ҳаёти солим, машғул шудан ба варзиш баҳри солимгардонии рӯҳу тан бояд яке аз масъалаҳои муҳими ҳар давру замон бошад. Рӯзи варзишгаронро дар сатҳи баланд баргузор намудан ин барои ҳар як варзишгар таъсири худро мерасонад. Ҳар як варзишгар боз ҳам шавқу рағбати хешро нисбати варзиш бедор месозад. Вақте ки дар Рӯзи варзишгарон варзишгарони номдори Тоҷикистон суханронӣ мекунанд, дигар варзишгарон бошанд, онҳоро дида мақсади ба монанди онҳо шуданро дар қалби худ мепарваранд. Ҳар як варзишгар дар ҷодаи варзиши интихобкардаи худ пайваста ба тамрин машғул мешавад, то ба мақсади хеш расад. 

Қурбонзода Маҳмуд, 
корманди Бахши кор бо ҷавонон ва варзиши ноҳияи Ёвон

Ба ҳамагон маълум аст, ки Ҳукумати кишвар нисбат ба соҳаи варзиш ва варзишгарон таваҷҷӯҳи хосса зоҳир намуда, тамоми шароитҳоро муҳайё сохтааст. Бояд варзишгарон тамоми қувваи худро ба харҷ диҳанд то ба ғамхории падаронаи Пешвои муаззами миллат сазовор гарданд. Ин беҳтарин иқдом аст ва шояд дар замири ҳар як варзишгар бедор сохтани ҳисси ватандӯстӣ ва масъулиятшиносиро дар соҳаи интихобкардаашон бедор созад. Бо боварии комил гуфта метавонам, ки ин ба пешрафти соҳаи варзиши кишвар мусоидат хоҳад кард.

Таҳияи Малоҳат 
Холмуродова, “ҶТ”