ВАРЗИШ
Чоршанбе 17 Июл 2019 07:42
5454
Сухане чанд дар бораи дастаи рӯзномаи “Ҷумҳурият”, ки 3-сола мешавад

Ҳукумати мамлакат варзишро ҳамчун яке аз самтҳои асосии сиёсати иҷтимоии давлат эътироф намуда, барои пешрафти он, ҷалби васеи сокинони кишвар бо мақсади оммавигардонии варзиш, солимгардонӣ ва тарбияи ҷисму рӯҳи солим тадбирҳои муассирро амалӣ мегардонад.

Эмомалӣ Раҳмон


 Имрӯзҳо зери сиёсати варзишпарваронаи Асосгузори сулҳу ваҳдати миллӣ-Пешвои миллат, муҳтарам Эмомалӣ Раҳмон варзиш дар кишвари мо ба таври назаррас оммавӣ шуда истодааст. Пешвои миллат солҳои охир иқдомоти шоистаеро дар ин самт роҳандозӣ кардаанд, ки дар кӯтоҳтарин муҳлат натиҷаҳои хуб ба бор оварданд. Таъсис ёфтани “Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ” намунаи возеҳи ташаббусҳои Роҳбари давлат дар соҳаи варзиш мебошад. Ин ҷоиза, бешубҳа, масъулияти варзишгарони тоҷикро бамаротиб зиёд намуд. Ин буд, ки пас аз таъсиси ҷоизаи мазкур Парчами кишвар дар баландтарин қуллаи варзиш – Олимпиада парафшон ва Суруди миллииТоҷикистон танинандоз гардид.

Шуруъ аз соли 2010 бо супориши Пешвои миллат тамоми вазорату идораҳои мамлакат вазифадор шуданд, ки баҳри тарғиби тарзи ҳаёти солим ва оммавияти варзиш дар кишвар чораҳои зарурӣ андешанд. Гузашта аз ин, Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар Паёмҳои ҳарсолаашон ба Маҷлиси Олӣ бевосита таъкид менамоянд, ки ҳар як ташкилоту муассиса дар оммавияти варзиш ҳатман саҳмгузор бошанд. “Соли оммавияти футбол” эълон гаштани соли 2014 гувоҳ аз он буд, ки дар кишварамон ба оммавӣ гаштани варзиш таваҷҷуҳи хосса зоҳир карда мешавад. Иқдоми мазкур бори дигар кишвари моро дар ҷаҳон ҳамчун давлати варзишдӯст муаррифӣ намуд.

Зимнан, нашрияи расмии Ҷумҳурии Тоҷикистон - “Ҷумҳурият” низ ба ин масъала диққати махсус дода, қатори дигар вазорату сохторҳои Ҳукумат дар самти тарғиби тарзи ҳаёти солим яке аз беҳтаринҳо маҳсуб мешавад. Инак, тайи се сол мешавад, ки кормандони нашрия, аз роҳбарият сар карда, то ҳайати эҷодиву техникии он, ҳафтае се маротиба баъд аз соатҳои корӣ ба варзиш машғуланд. Ва метавон гуфт, як дастаи хуби футболро созмон додаанд. Ҳайати дастаро бозингарони аз 21 то 55-сола ташкил медиҳанд. Мақсади асосии даста пеш аз ҳама роҳандозии дастуру супоришҳои Пешвои миллат дар самти тарғиби тарзи ҳаёти солим аст. Дар баробари ин, бо хоҳиши бозингарон баъди шартнома бастан бо яке аз мураббиёни таҷрибадори футболи хурд дар кишвар-Тоҷиддин Мираков роҳбарияти даста тасмим гирифтаанд, дар мусобиқаҳои ҷумҳуриявии футбол (ба монанди Ҷоми вазири корҳои дохилӣ, Ҷоми раиси шаҳри Душанбе ва ғ.), ки ҳар сол дар байни вазорату идораҳо доир мегардад, ширкат кунанд. Айни ҳол даста бо якчанд тимҳои футболи хурд дар кишвар ба монанди “Спитамен”-и Вазорати корҳои дохилӣ бозиҳои рафиқона анҷом додааст.

Бино ба гуфтаи сармураббии даста Тоҷиддин Мираков маҳорати бозингарии футболбозони даста рӯз аз рӯз беҳтар шуда истодааст.

-Рӯзҳои аввали ба кор оғоз кардан ба дастаи мазкур ҳамчун тими ҳаваскор менигаристам, вале шавқу рағбати бозингарон ва масъулияти баланди онҳо маро маҷбур кард, ки бо онҳо ҷиддӣ кор кунам. Синну соли бозингарони даста гуногун аст ва бо вуҷуди ин, ҳама супоришҳое, ки дар давоми тамрин дода мешавад, сарбаландона аз уҳдааш мебароянд. Даста аз ҷиҳати физикию психологӣ аллакай ба дастаҳои ҳаваскори вазорату идораҳо баробар аст. Танҳо каме таҷриба намерасад. Дар умум бисёр хуб аст, вақте бачаҳо дар баробари машғул шудан ба кори эҷодӣ, барои ҳифзи саломатии худ ба варзиш низ машғуланд, -гуфт Тоҷиддин Мираков.

Ташрифулло Саъдуллоев, бозингари даста, ба он назар аст, ки барои кормандони эҷодӣ бозии футбол аз лиҳози ҳифзи саломатӣ, беҳтар намудани кори системаи асабу дил ва таҳкими дӯстию рафоқат байни коргарон нақши муҳим мебозад: “Дар баъзе идораҳо коргароне ҳастанд, ки бо вуҷуди якҷо кор кардан, муддати дароз ба ғайр аз ҷаласаҳои корӣ сарҷамъ намешаванду бо якдигар хушҳолӣ намекунанд. Ин иқдом дар баробари тарғиби тарзи ҳаёти солим яке аз омилҳои сарҷамъист. Ҳарчанд рӯзнома ҳамарӯза аз чоп мебарояд, вале ҳайати эҷодӣ вақт ёфта, баҳри тарғиби тарзи ҳаёти солим ба варзиш машғуланд”.

Ҳукумати кишвар ҷиҳати рушди бемайлони футбол “Барномаи рушди футбол барои солҳои 2017-2020”-ро қабул кард, ки он марҳилаи дуюми инкишофи футбол дар мамлакат маҳсуб меёбад. Роҳандозии футбол дар коллективҳои меҳнативу муассисаҳои давлатӣ ба гуфти Раҷабалӣ Исматуллоев, корманди нашрияи мазкур, низ дар ин солҳо шоистаи таҳсин буда, баргузории мусобиқаҳо миёни онҳо дар солимгардонии аҳли ҷомеа ва оммавияти футбол нақши бориз дорад.

-Бояд зикр кард, ки кормандони нашрияи расмии Ҷумҳурии Тоҷикистон – “Ҷумҳурият” ҳам дар пайи иқдому ибтикороти наҷиби фавқуззикр дастаҳои волейболу футболро ташкил карда, берун аз вақти кор пайваста бо варзиш, алалхусус бозии футбол, машғуланд. Дар такмилу гузаронидани мусобиқаҳо саҳми сармуҳаррири рӯзнома, ки худ яке аз футболбозони хуби даста мебошад, арзанда аст. Тайи се сол аст, ки даста фаъолият дорад ва дар ин муддат маҳорати бозингарии аъзои он такмил ёфта, бо тимҳои гуногун дидорҳои дӯстона анҷом дод, -гуфт И. Раҷабалӣ.

Ба андешаи Хуршеди Ҷовид, бозингари даста, ки аз соли 1982 то имрӯз дар “Ҷумҳурият” (“Тоҷикистони советӣ”, “Тоҷикистони шӯравӣ”) кор мекунад, иқдоми мазкур аз солҳои пеш дида, имрӯз дар дараҷаи олӣ ба роҳ монда шудааст: “Ёд надорам, ки солҳои пеш нафаре аз раёсати рӯзнома ба майдон баромада, волейболу футбол бозӣ карда бошад. Аз мансабдорони вақт танҳо котиби масъули рӯзнома Наҷмиддин Азизов бо футболбозон пайваста буд.

Баъди ба “Ҷумҳурият” ба ҳайси сармуҳаррир омадани Қурбоналӣ Раҳмонзода аввал дастаи волейбол, баъд футбол ташкил ёфт. Ҷӯшу хурӯши қаламкашони ҷавон ба банда ҳам беасар намонд, ки синну сол фаромӯш карда, ба онҳо пайвастам. Аммо чанде пас “шиша сандон шикаст”: Дар яке аз бозиҳо поям зарб хӯрду ду ҳафта дар гаҷ буд. Ҳамин тавр, ғайриихтиёр аз бозингар ба мухлиси даста табдил ёфтам. Машғулияти фаъолона бо варзиш барои қаламкашони “Ҷумҳурият” на танҳо ҷисми солим, ҳамчунин, нерӯи иловагии зеҳнист, ки навиштаҳояшонро равону хонданӣ мекунад. Сеюм ҳадаф ҳам ҳаст – дар коллектив фароҳам овардани муҳити дӯстию рафоқат, дастгирии ҳамдигар, муттаҳидӣ.

Шаҳбози Аброр, ягона бозингари даста аст, ки бо вазни зиёда аз 100 кило қатори дигарон баҳри барқарор сохтани солимии бадан пайи тамрин аст. Ба қавли ӯ,то ба даста пайвастан ба ягон намуди варзиш машғул набуд ва хурсанд аз он аст, ки бо варзиш машғул шудан дар ҳаёташ дигаргуниҳои зиёд ворид намуд.

- Вақте ман ба рӯзномаи “Ҷумҳурият” ба кор омадам, дастаи футбол фаъолият дошт. Бозиҳои онҳоро тамошо карда, нигоҳам ба варзиш, махсусан футбол, дигар шуд. Ҳамин тавр, аъзои даста шудаму дар фаъолияти меҳнатӣ ва саломатиям бартариятро эҳсос кардам. Бозии мо аз тамрин оғоз мешавад, ки барои беҳбудии саломатиамон хеле муфид аст. Имрӯзҳо худро бардам ҳис мекунам. Кори мо ба эҷод алоқаманд аст ва давоми рӯз дар назди компютерем ва ҳамин бозии футбол аст, ки моро каме ҳам бошад, аз ҳолати маъмулию якранг фориғ медорад.

Маҳмуд Ҷӯраевро қаблан ҳамагон ҳамчун дарвозабони дастаи “Сомонӣ”-и ноҳияи Данғара мешинохтанд. Айни ҳол ӯ дарвозаи дастаи “Ҷумҳурият”-ро ҳимоя мекунад. Ӯ ба даста пайвастанашро чунин шарҳ дод: “Аз рӯзҳои аввали дар нашрия таҷрибаомӯз буданам ҳафтае 3 маротиба дар майдончаи КТН “Шарқи озод” бозии футбол доир мегардид. Баъди корманди “Ҷумҳурият” шуданам ин анъана идома ёфт ва тасмим гирифтам, ки дар нашрияи мазкур ҳам фаъолияти эҷодӣ ва ҳам варзишӣ дошта бошам. Футбол барои мо як василаи рафъи хастагӣ гардида, бо машғул шудан ба он ҳама мушкилоти давоми рӯзи корӣ ба миён омада фаромӯш мешавад. Ҳамчунин, варзиш ҳамдигарфаҳмиву эътимод ва дӯстиву рафоқати кормандонро меафзояд. Тавре мегӯянд, инсони ҷисман солим рӯҳан низ муқтадир ва шикастнопазир аст”.

Дастаи “Ҷумҳурият” аз рӯи намуди волейбол ва футбол давоми фаъолияти худ дар якчанд мусобиқаҳои сатҳи ҷумҳуриявӣ иштирок намуда, ба натиҷаҳои назаррас ноил гардидааст. Даста аз рӯи намуди волейбол соли 2016 дар мусобиқаи ҷумҳуриявӣ миёни кормандони ВАО барои ба даст овардани Ҷоми рӯзномаи “Ҷавонони Тоҷикистон” аввалин шуда аз гурӯҳи худ ба даври дигар баромад. Аз намуди футбол бошад, дар Ҷоми “Шарқи озод”-2016 беҳтарин даста ҳисобида шуд. Саҳми дигари рӯзнома дар тарғиби тарзи ҳаёти солим ва оммавияти варзиш дар он аст, ки гӯшаи варзишии рӯзнома фаъол буда, ҳамарӯза хабару гузоришҳо ва маводҳои ҷолибу хонданӣ чоп мешаванд.

Дарвоқеъ, баъди эълон гардидани соли 2014 ҳамчун “Соли оммавияти футбол”дар кишвар варзиши рақами яки ҷаҳон-футбол дар Тоҷикистон рушд намуд. Давоми ду соли охир танҳо дар шаҳри Душанбе бо ибтикори шаҳрдори ҷавон муҳтарам Рустами Эмомалӣ зиёда аз 167 майдончаи варзишӣ сохта ба истифода дода шуд, ки айни ҳол онҳо ба макони фароғату солимии наврасону ҷавонон табдил ёфтаанд. Дар назар аст, ки то ҷашни Истиқлолияти давлатӣ дар шаҳри Душанбе боз 58 майдончаи варзишии замонавӣ сохта мешавад. Ин имкон медиҳад, ки варзиш миёни мардуми варзишдӯсти тоҷик боз ҳам оммавитар гардад. Пешвои миллат муҳтарам Эмомалӣ Раҳмон варзишро ҳамчун яке аз самтҳои асосии сиёсати иҷтимоии давлат эътироф намуда, дар яке аз баромадҳояшон таъкид намуда буданд, ки “Варзиш ҳамчун зеботарин шуғли инсон таърихи куҳан дошта, воситаи муҳимми беҳдошти саломатӣ ва таблиғи тарзи ҳаёти солим ба ҳисоб меравад ва барои таҳкими дӯстии одамон ва муаррифии давлату миллатҳо дар арсаи ҷаҳонӣ нақши муҳим мебозад”.

Аъзои дастаи футболи “Ҷумҳурият” низ давоми се сол мешавад, ки дар тарғиби тарзи ҳаёти солим саҳмгузоранд ва нақша доранд, ки дастаашонро дар сатҳи футболи кишвар муаррифӣ намоянд. Мо умедвори ба як дастаи муқтадири кишвар табдил ёфтани “Ҷумҳурият” ҳастем ва дар кори тарғиби тарзи ҳаёти солим ба онҳо барору комёбӣ хоҳонем.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Июл 2019 c.