Боиси хушнудист, ки дар шароити имрӯзаи рушд ва дар доираи татбиқи сиёсати созанда ва варзишпарваронаи Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон ва Ҳукумати кишвар, ки дар маркази он ташвиқу тарғиби тарзи ҳаёти солим инъикос меёбад, рӯ овардан ба варзиш машғулияти асосии мардум, бахусус наврасону ҷавонон гардидааст.

Қобили қайд аст, ки мардуми мо ба тарбияи ҷисмонӣ ва варзиш ҳамчун воситаи муҳими беҳдошти саломатӣ ва ташаккули ҷисмониву маънавӣ ҳанӯз аз замонҳои қадим майлу рағбати зиёд доштанд.

Аҷдодони мо барои беҳдошти саломативу нерӯи ҷисмонӣ ва ҳамеша омода будан ба дифои марзу бум ва мардуми хеш усулҳои гуногуни варзиш, амсоли давидану ҷаҳидан, найзапартоиву шамшерзанӣ, гурзпартоиву камонварӣ, аспдавонию чавгонбозӣ, гӯштину шиноварӣ ва дигар навъҳои варзишро инкишоф медоданд. Онҳо ҷавононро ба хотири тавоноии маънавию ҷисмонӣ аз овони кӯдакӣ барои иҷрои машқҳои гуногуни варзишӣ омода месохтанд. Ин анъанаи нек то замони мо омада расидааст.

Варзиш дар баробари ташвиқу таблиғи тарзи ҳаёти солим, инчунин, яке аз воситаҳои беҳтарини таҳкими дӯстии миёни инсонҳо ва кишварҳои ҷаҳон аст. Ҳамзамон, бо ин варзиш омили муҳими ҷаҳоншиносии инсон, ба ҳамдигар муаррифӣ ва наздик гардидани халқу миллатҳо ва кишварҳои мухталифи ҷаҳон мебошад.

Соҳаи тарбияи ҷисмонӣ ва варзиш дар рушду нумӯи ҳар давлат муҳим буда, фаъолият дар ин соҳа далериву мардонагӣ, ҳушёриву зиракӣ, покиву озодагӣ ва садоқатмандӣ ба миллату ватанро тақозо менамояд.

Бо ифтихор метавон зикр намуд, ки имрӯзҳо варзишгарони тоҷик дар қатори ҳазорон шаҳрвандони бо нангу номуси Тоҷикистон дар ин соҳа хизматҳои шоиста намуда, баҳри баланд гардидани нуфузу эътибор ва шарафи Ватани азизамон саҳми арзандаи худро мегузоранд.

Маҳз Истиқлолияти давлатӣ ва таваҷҷуҳи созанда ва дурандешонаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон боиси он гардид, ки соҳаи тарбияи ҷисмонӣ ва варзиш яке аз самтҳои афзалиятноки сиёсати иҷтимоии Ҳукумати мамлакат пазируфта шуда, тамоми санадҳои дахлдор ба хотири таъмини оммавияти варзиш, таҳкими тарзи ҳаёти солим, мусоидат намудан ба омодакунии варзишгарони касбӣ ва ба ин васила муаррифӣ намудани давлату миллат дар арсаи байналмилалӣ роҳандозӣ гардид.

Солҳои охир варзишгарони кишварамон дар мусобиқаҳои байналмилалӣ пайваста иштирок намуда, нуфузу эътибори сарзамини соҳибистиқлоламонро баланд бардошта, Тоҷикистони озодро дар арсаи ҷаҳонӣ муаррифӣ менамоянд. Имрӯз тамоми мардуми кишвар аз пирӯзиву комёбиҳои варзишгарону паҳлавонон дар мусобиқаҳои ҷаҳонӣ, аз ҷумла медалҳои олимпӣ ва дигар мукофоту дастовардҳои назарраси онҳо ифтихор доранд.

Агар дар зарфи 70 соли даврони Шӯравӣ варзишгарони мо аз мусобиқаҳои сатҳи байналмилалӣ 133 медал ба даст оварда бошанд, дар даврони соҳибистиқлолии кишвари азизамон ин шумора ба 3546 (се ҳазору панҷсаду чилу шаш) адад расидааст.

Дар ин давра варзишгарони мамлакат дар як қатор чорабиниҳои байналмилалӣ, чемпионатҳои ҷаҳон, Осиё, Бозиҳои олимпӣ, Бозиҳои осиёӣ, Шоҳҷомҳо иштирок намуда, ба дастовардҳои таърихии даврони Истиқлолият ноил гардиданд.

Ҳайати Ҷумҳурии Тоҷикистон аз соли 1996 ин ҷониб дар бозиҳои тобистонаи олимпӣ иштирок намуда, дар давраи Истиқлолияти давлатӣ 1 медали тилло, 2 медали нуқра ва як медали биринҷии ин бозиҳо насиби варзишгарони шарафманди Тоҷикистон гардидаааст.

Аз ҷумла, медали тиллои Дилшод Назаров дар Бозиҳои 31-уми олимпии Рио-де-Жанейро-2016 туҳфаи беназир барои миллати шарафманди тоҷик буд.

Хусусан баҳри ҳавасманд намудани варзишгарони бомаҳорати кишвар дар соли 2015 “Ҷоизаи Президенти Ҷумҳурии Тоҷикистон барои ғолибону ҷоизадорони мусобиқаҳои варзишии байналмилалӣ” таъсис дода шуд, ки то имрӯз се маротиба бо Амрҳои Президенти Ҷумҳурии Тоҷикистон 36 нафар варзишгарон бо ин ҷоиза сарфароз гардонида шудаанд, ки ҳаҷми умумии маблағи ҷоизапулӣ 1296250 (як миллиону дусаду наваду шаш ҳазору дусаду панҷоҳ) сомониро ташкил медиҳад, ки маблағҳои мазкур аз ҳисоби Фонди захиравии Президенти Ҷумҳурии Тоҷикистон ҷудо гардидаанд.

Маҳз дастгирии бевоситаи Ҳукумати Ҷумурии Тоҷикистон, аллалхусус дастгириҳои бевоситаи Асосгузори сулҳу Ваҳдати миллӣ – Пешвои миллат, муҳтарам Эмомалӣ Раҳмон буд, ки соҳаи тарбияи ҷисмонӣ ва варзиш аз қадамҳои аввал фаъолияти худро оғоз намуда, дар ин самт як қатор корҳоро ба анҷом расонид.

Мувофиқи маълумотҳои оморӣ дар ин давра 8850 иншооти варзишӣ новобаста аз шакли моликияташон дар ҷумҳурӣ ба қайд гирифта шудааст, ки аз ин 117 варзишгоҳ, 6204 майдончаи варзишӣ, 1655 толори варзишӣ, 85 ҳавзи шиноварӣ ва 789 маҷмаа, иншооти махсуси варзишӣ, аз қабили тир, боулинг, фитнес ва клубҳои ихтиёрӣ мебошанд.

Бо мақсади ҷалби наврасону ҷавонон ба варзиш дар ҷумҳурӣ 134 мактабҳои варзишӣ амал менамоянд, ки аз ин 5 мактаби маҳорати олии варзишии ҷумҳуриявӣ, Маркази омодагии олимпӣ дар шаҳри Хоруғ, 2 мактаби маҳорати олии варзишии вилоятӣ, 3 мактаби махсуси варзишии ҷумҳуриявӣ, 12 мактаби махсуси варзишии захираҳои олимпӣ (10 мактаб дар ш. Душанбе, 1 мактаб дар ш. Хуҷанд ва 1 мактаб дар н. Рӯдакӣ), 90 мактаби варзишӣ дар шаҳру ноҳияҳо ва 21 мактаби варзишӣ дар тобеияти Иттифоқҳои касабаи мустақил ва ташкилоти ҷамъиятии “Ҳосилот” мебошанд.

Шумораи мактабҳо нисбат ба ҳамин давраи соли 2016 2 адад зиёд гардидааст, ки ин мактабҳо дар ноҳияи Ашти вилояти Суғд ва ноҳияи Рӯдакӣ дар соли 2016 таъсис ёфтааст.

Дар масири таърих варзиш ҳамчун як рукни муҳими ҳаёти ҳаррӯзаи ҳар як фарди миллати фарҳангсолори тоҷик арзёбӣ гардида, он дар баробари тақвият бахшидани қувваи ҷисмонӣ, барои наврасону ҷавонон ҳамчун майдони мукаммалгардонии нерӯи зеҳнӣ ва хислатҳои наҷиби инсонӣ хизмат менамояд.

Боиси ифтихор ва сарфарозист, ки нахустин шуда сарпарастии “Соли ҷавонон”-ро муҳтарам Рустами Эмомалӣ, Президенти Федератсияи футболи Тоҷикистон, ба уҳда гирифта, ҳамовозии хешро баҳри амалӣ намудани сиёсати давлатии ҷавонон изҳор намуданд.

Ҳамзамон, соли 2017 нахустин маротиба зери роҳбарии Президенти Федератсияи футболи Тоҷикистон дар кишвар Фестивали бозиҳои миллии варзишӣ таъсис ва дар се марҳила баргузор гардида истодааст.

Қобили зикр аст, ки таҷлили имсолаи Рӯзи варзишгарон ба эълон гардидани соли 2017 “Соли ҷавонон” рост омада, дар ин даври силсилачорабиниҳои оммавӣ–варзишӣ ва солимгардонӣ баҳри сиҳатии омма баргузор гардид.

А. АБДУЛЛОЗОДА, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон