14-уми октябр, дар доираи Форуми байналмилалии соҳибкории Душанбе-2016, таҳти унвони “Рушди истеҳсолоти миллӣ - имконияти нави сармоягузорӣ”, ки дар Китобхонаи миллии Тоҷикистон доир гардид, дар баробари дигар соҳаҳо масоили соҳаи сайёҳӣ бо номи “Тоҷикистон - кишвари сайёҳӣ, имкониятҳои рушд” низ баррасӣ шуд.

Дар он намояндагони воломақоми Ҳукумати кишвар, ширкатҳои сайёҳии дохиливу хориҷӣ, коршиноси сатҳи ҷаҳонӣ ва рӯзноманигорон иштирок доштанд.



Назарзода Ризо, муовини раиси Кумитаи ҷавонон, варзиш ва сайёҳӣ вобаста ба мавзӯъҳои “Рушди инфрасохтори сайёҳӣ ҳамчун омили муҳими истифодаи босамари захира ва имкониятҳои кишвар” ва “Мавзеъҳои биҳиштосо ва кашфношуда дар мисоли Канаски Ромит ва Сағирдашти Дарвоз: дурнамои ҷалби сармоя ба онҳо” маърӯза карда, иброз дошт, ки дар соли 2015 даромади умумӣ (экспорт) аз туризми байналмилалӣ ба 1,5 триллион доллар ё 10 фоиз маҷмӯи маҳсулоти дохилии ҷаҳон, ташрифи сайёҳони байналхалқӣ 4 фоиз афзоиш ёфта, ба 1,2 миллиард нафар расидааст. 6 фоиз даромади умумиҷаҳонӣ, 7 фоиз сармояи ҷаҳонӣ, 11 фоизи харҷи истеъмолӣ, 5 фоиз воридоти андоз ва ҳар 16-умин лоиҳаи кор ба рушди соҳаи сайёҳӣ тааллуқ дорад. “Дар муқоиса бо давлатҳои абарқудрати дунё, ки имрӯз дар рушди соҳаи сайёҳӣ натиҷаи баланд ба даст овардаанд, дар мисоли давлатҳои Аврупо, ки дар соли 2015 аз ҳисоби соҳаи сайёҳӣ 509 миллиард доллар, ШМА 177 миллиард доллар, Испания 65 миллиард доллар ва Чин 57 миллиарди доллари амрикоӣ даромад ба даст овардаанд, ки 30 фоизи содироти хизматрасонии ҷаҳониро ташкил медиҳад”, - гуфт Ризо Назарзода.

Гуфта шуд, ки соли 2015 дар кишвар нишондиҳандаи баландтарини ташрифи сайёҳон - 414 ҳазор нафар ба қайд гирифта шуд. Дар шаш моҳи соли равон нисбат ба ҳамин давраи соли 2015 16 ҳазор нафар бештар сайёҳон ба ҷумҳурӣ ворид шудаанд. Агар то соли 2015 шаҳрвандони 59 давлати дунё ҳамчун сайёҳ аз Тоҷикистон боздид карда бошанд, дар шаш моҳи соли ҷорӣ ин нишондиҳанда ба 100 давлат расид, ки ин ҳама гувоҳи рушд кардани туризм дар Тоҷикистон мебошад.

Айни замон дар бозори сайёҳии Тоҷикистон 107 ширкати сайёҳӣ фаъолият карда истодаанд, ки 50-тои он бо хатсайри содиротӣ, 57 ширкат бо хатсайри воридотӣ бо пешниҳоди 60 хатсайри дохилӣ имконият ва захираҳои сайёҳиро муаррифӣ карда истодаанд.

Зикр гардид, ки табиати тозаи мавзеъҳои биҳиштосои Канаски Ромит ва Сағирдашти Дарвоз ба барқароркунии саломатӣ ва туризми экологӣ хеле мусоид аст. Дар ин мавзеъҳо ба роҳ мондани туризми асотирӣ ва табиати зинда, кашфношуда, агросайёҳӣ, велотур, мототур, аспсаворӣ, човандозӣ, муолиҷавӣ ва табобатӣ (5 чашмаи гарм), туризми куҳию варзишӣ, туризми лижатозии куҳӣ, экологӣ ва барқароркунии саломатӣ, шикор ва рафтинг ба мақсад мувофиқ мебошад.

Нуъмон Абдуғаффорзода, роҳбари Шӯрои машваратии назди Президети Тоҷикистон оид ба беҳтар намудани фазои сармоягузорӣ дар мавзӯи “Ислоҳоти соҳаи сайёҳӣ” маърӯза карда, вобаста ба афзалияти даромадҳои бахши туризм аз ҷумла қайд кард: “Қисми зиёди даромадҳо бо асъори хориҷӣ ба даст оварда мешаванд, аз ҳар як доллари ба бахши туризм харҷшуда 70 сенти он даромади соф аст, ҳар 1 доллари дар бахши туризм сарфкардашуда 3 доллари дигарро дар сохторҳои алоқаманди бахши туризм ба вуҷуд меорад, ба ҳисоби миёна аз ҳар 1 доллари сарфшуда дар бахши туристӣ 91 сенти он дар иқтисодиёти ватанӣ мемонад, тақсимоти нисбатан баробари асъори хориҷиро ба роҳ мемонад, имконияти соҳибкорӣ барои ҳамагон мебошад”.

Ба гуфтаи Н. Абдуғаффорзода, дар назди Котиботи Шӯрои машваратӣ гурӯҳи корӣ таъсис дода шудааст, ки фаъолияташ барои таҳлил дар самтҳои мухталифи сайёҳӣ ва вазъи хизматрасониҳои сохторҳои сайёҳӣ равона карда шудааст. Гурӯҳи корӣ ҶСК “Фурудгоҳи байналмилалии Душанбе”, Раёсати консулии Вазаорати корҳои хориҷӣ, Хадамоти шиносномавию бақайдгирии Вазорати корҳои дохилӣ, Агентии омор, Сарраёсати Қӯшунҳои сарҳадии Кумитаи давлатии амнияти миллӣ ва Вазорати корҳои хориҷиро мавриди санҷиш қарор дода, бо вазъи имрӯзаи онҳо аз наздик шинос шуд.

Онҳо мавриди санҷиши худ бештар ба баланд бардоштани дараҷаи хизматрасонӣ ба мусофирон диққат доданд: таҳия ва қабули Одобномаи кормандони фурудгоҳ, азнавсозӣ ва модернизатсияи техникаҳои хизматрасонии фурудгоҳ, омода намудани иттилоот барои бақайдгирии мусофирон бо се забон, ҷойгир намудани иттилоот оид ба маҳсулоти ширкатҳои туристӣ ва минтақаҳои туризми Тоҷикистон бо забонҳои тоҷикӣ, русӣ ва англисӣ.

Ҳамчунин, дар Хадамоти гумруки назди Ҳукумати Тоҷикистон масъалаҳои аз нав таҷҳизонидани минтақаҳои назорати гумрукӣ дар фурудгоҳҳо, баҳогузории сатҳи тахассуснокии кормандони фурудгоҳҳо ва тариқи озмун ба кор қабул намудани онҳо, баланд бардоштани савияи забондонии кормандон, таҳия ва мавриди амал қарор додани санади дахлдор оид ба муносибати эҳтиромонаи кормандони мақомоти гумрук нисбат ба мусофирон ва иштирокчиёни фаъолияти иқтисодии хориҷӣ, ташкили курсҳои махсуси такмили ихтисос мавриди таҳлил қарор гирифт.



Миралиён Қиёмиддин, вакили Маҷлиси намояндагон дар мавзӯи “Такмили заминаҳои меъёрӣ-ҳуқуқии соҳаи сайёҳӣ” маърӯза кард. “Дар давоми 25 соли соҳибистиқлолӣ махсусан аз ҷониби Ҳукумати ҷумҳурӣ дар самти татбиқи сиёсати давлатӣ дар ин соҳа дар маҷмӯъ 30 санади қонунгузорӣ қабул гардид. Заминаҳои меъёрӣ-ҳуқуқӣ ва инфрасохтори рушди соҳа, ки имрӯз татбиқкунандаи сиёсати давлат ҳастанд, Қонуни Ҷумҳурии Тоҷикистон “Дар бораи туризм”, ки се маротиба ба он тағйиру иловаҳо ворид шуд ва айни замон маҳз дар асоси нақша чорабиниҳои шӯрои машаваратӣ қонун дар баррасии таҳия ва таҳрири нав қарор дорад. Инчунин, қонунҳое (кодексҳое), ки танзими муносибатҳоро дар соҳаи туризм бевосита ва ё бавосита фаро мегиранд: кодексҳои андоз, гумрук, қонунҳо “Дар бораи ҷавонон ва сиёсати давлатии ҷавонон”, “Дар бораи фаъолияти волонтёрӣ”, “Дар бораи тарбияи ҷисмонӣ ва варзиш”, “Дар бораи муҳити зист”, “Дар бораи ҳудудҳои табии махсус муҳофизатшаванда”, “Дар бораи муқовимат ба савдои одамон ва расонидани кӯмак ба қурбониёни савдои одамон”, “Дар бораи ҳифзи саломатии аҳолӣ”, “Дар бораи танзим ва назорати асъор”, “Дар бораи минтақаҳои куҳӣ”, “Дар бораи осорхонаҳо ва фонди осорхонаҳо”, “Дар бораи ҳифзи ҳавои атмосфера”, “Дар бораи маърифати экологии аҳолӣ” ва ғайра. Консепсияи миллии рушди туризм барои солҳои 2009-2019, Барномаи рушди туризм барои солҳои 2010-2014 ва барои солҳои 2015-2017”.

Дар чорабинӣ, ҳамчунин мавзӯъҳои “Бренди байналмилалӣ: раванди ҷалби сармоя ба иқтисодиёти Тоҷикистон”, “Самтҳои афзалиятноки соҳаи сайёҳии Тоҷикистон: барои чӣ Тоҷикистонро бояд дид?” мавриди баррасӣ қарор гирифтанд.