САЙЁҲӢ
Сешанбе 25 Феврал 2020 10:52
6755
Тоҷикистон бо манзараҳои дилнишини худ ҳар бинандаро мафтун месозад. Яке аз маконҳои зебову диданӣ ноҳияи Варзоб мебошад. Ноҳияи Варзоб дар қисмати шимолу ғарби пойтахти мамлакат, дар баландии 1269 метр аз сатҳи баҳр, дар байни қаторкӯҳҳои Ҳисор ҷойгир буда, иқлими муътадил дорад. Масоҳати умумии он 1656 километри мураббаъ ва аҳолиаш 80 ҳазору 665 нафарро ташкил медиҳад. Маркази ноҳияи Варзоб аз шаҳри Душанбе дар масофаи 25 километр ҷойгир аст.

Бояд гуфт, ки бо қарори Ҳукумати ҷумҳурӣ аз 9 ноябри соли 2000-ум, №461 “Барномаи мақсадноки комплексии рушди ноҳияи Варзоб ҳамчун минтақаи истироҳатӣ, табобатӣ, санитарию курортӣ ва туризм” эълон карда шудааст.

Яке аз маконҳои дилрабои ноҳияи Варзоб ин Маҷмааи лижаронию сайёҳии “Сафед-Дара” мебошад, ки аз моҳи октябр то моҳи май он лабрези сайёҳони дохиливу хориҷист. Ҳангоми ба ин минтақа ворид шудан худ шоҳид мегардед, ки атрофи шуморо табиати нодире иҳота кардааст. Дар ин макон аз сафедии барф кас ҳаловат мебарад. Ҳар нафаре, ки аз он дидан менамояд, ба худ хотироти нек мебардорад. Дар он барои сайёҳону меҳмонон тамоми шароитҳои зарурӣ фароҳам оварда шудааст. Ин макон ҳамеша пуродам аст. Аксари мардум умри Сафед-Дараро ҳазорсола мегӯянд ва дар бораи он қиссаву ривоятҳои гуногуне доранд.

Аз замони ворид шудан ба ин макон худ эҳсос менамоед, ки ба оғуши як табиати дилангезе ворид гардида истодаед. Дараи мазкурро аз ду тараф талу теппаҳои зебое иҳота намудааст. Имрӯз баҳри рушди сайёҳӣ дар ин макони зебо пайваста тадбирҳои гуногун андешида мешаванд. Роҳе, ки то Сафед-Дара ҳаст, ба талабот ҷавобгӯ буда, меҳмонон метавонанд беташвиш ба ин макон ташриф оранд.

Ба таъкиди Азамат Мансуров, муовини директори Маҷмааи лижаронию сайёҳии “Сафед-Дара” табиати нотакрори ин диёри зебоманзар таваҷҷуҳи сайёҳонро ба худ ҷалб намудааст. “Воқеан, барои ҷалби бештари сайёҳон моро зарур аст, ки имкониятҳои мавҷударо дуруст истифода барем. Дар замони ҳозира, ки рӯз то рӯз шумораи сайёҳон зиёд шуда истодааст, мо бояд ба рушду нумуи соҳа аҳаммияти ҷиддӣ диҳем ва ин маконро обод кунем. Таҳлилҳо нишон медиҳанд, ки сол то сол теъдоди ташрифи сайёҳони ватаниву хориҷӣ ба ноҳияи Варзоб, алалхусус ба Сафед-Дара, меафзояд. Дар рушди сайёҳӣ пеш аз ҳама сиёсати дарҳои бози роҳбарияти мамлакат, тадбирҳои баҳри рушди соҳа равонашудаи Кумитаи рушди сайёҳии назди Ҳукумати ҷумҳурӣ, чорабиниҳои фарҳангии дар ҳудуди ҷумҳурию ноҳия баргузоршаванда ва бунёди иншооти нави туристӣ мусоидат мекунад. Солҳои охир дар ҷаҳон туризми дармонӣ маъруфият пайдо кардааст. Обҳои шифобахши маъдании ноҳия ва инфрасохтори мавҷуда имкон медиҳанд, ки дар оянда сайёҳон на фақат ба Сафед-Дара, балки ба дигар ҷойҳои Варзоб низ ташриф биёранд”.

Манучеҳр Юсупов менеҷер оид ба кор бо мизоҷон дар Маҷмааи лижаронию сайёҳии “Сафед-Дара” зимни суҳбат гуфт: “Айни ҳол ҳамаи хизматрасониҳои мо, аз ҷумла, Зиплайн, таноброҳи буғелӣ, таноброҳи ҳавоӣ, майдони яхмолак, сноутюбинг, аспсаворӣ, парки арғамчинӣ, барфҳаракаткунак (снегоход), меҳмонхона, барбекю, чойхона, тарабхона, кирояи лавозимотҳои лижаронӣ фаъоланд. Азбаски дар кишвари мо барф танҳо дар ин дара бисёр аст, мизоҷони мо на фақат аз кишварҳои дигар, балки шаҳрвандони Тоҷикистон низ ҳастанд. Аз рӯи омори мо 25 %-и меҳмонони мо аз хориҷи кишваранд. Рӯз то рӯз шумораи истироҳаткунандагони мо зиёд мешаваду кам не”.

Солҳои пеш дар сомонаҳои интернетӣ хотираҳои сайёҳон оид ба Тоҷикистон нисбатан кам ба назар мерасид. Ҳоло агар дар сомонаи интернетӣ ҷойҳои сайёҳиро ҷустуҷӯ кунем, мақолаву акс ва сабтҳои видеоии зиёдеро дарёфт карда метавонем, ки ин нишон аз рушди сайёҳӣ дар кишвари мост.

Тибқи омори расмии Кумитаи рушди сайёҳии назди Ҳукумати Ҷумҳурии Тоҷикистон аз оғози соли 2019 то ба имрӯз зиёда аз 1 миллион сайёҳи хориҷӣ аз 135 давлати дунё ба Тоҷикистон ташриф овардаанд, ки нисбат бо соли пешин 20 % зиёдтар аст.

Боварӣ дорем, ки дар гирду атрофи ин мавзеи хушманзара, яъне Сафед-Дара, дар оянда боз ҳам меҳмонхонаҳои хуштарҳ қомат афрохта, бо хизматрасонии олидараҷаву арзон боиси ҷалби бештари сайёҳони дохилию хориҷӣ мегарданд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 1

Феврал 2020 c.