Чанде пеш дар марказии ҷамоати шаҳраки “Панҷ”-и ноҳияи Панҷ гурӯҳи калони ҷавонону наврасон ва одамони касбу кори гуногун ҷамъ омада, эътирози худро алайҳи терроризм баён намуданд.

Дар чорабинӣ, ки таҳти унвони “Нест бод терроризм!” бахшида ба “Соли ҷавонон” баргузор шуд, доираи васеи ҷавонон аксияи иттилоотӣ доир намуда, дар бозору кӯчаҳои ноҳия варақаҳои гуногуни иттилоотӣ тақсим карданд.

Сипас, дар қасри фарҳанги ноҳия вохӯрии муовини раиси ноҳия Шарифзода Марям, сардори шӯъбаи вазорати корҳои дохилӣ, Одиназода Фирӯз, мудири бахши кор бо ҷавонон ва варзиши ноҳияи Панҷ Ҳасан Ҳакимов бо ҷавонон доир гардид.

Шарифзода Марям иброз намуд, ки: “Ба ин кори нангин аслан онҳое даст мезананд, ки мафкураи хеле танг ва сатҳи ҷаҳонбинии паст доранд ва ин боис мегардад, ки онҳо ба дастгоҳи амалӣ намудани ҳадафҳои ғаразноки манфиатхоҳон мубаддал шаванд. Ин ҳамаи моро водор месозад, ки барои решакан намудани он дар якҷоягӣ талош намоем”.

Одиназода Фирӯз ба иллати нодонӣ ва ноогоҳӣ аз мақсадҳои нопоки гурӯҳҳои манфиатхоҳ ба майдони ҳарб кашида шудани бархе аз ҷавонон ва шомил шудани онҳоро ба гурӯҳҳои террористӣ ва экстремистӣ ба риштаи таҳлил кашида, бахусус падарону модаронро ҳушдор дод, ки ба ин масъала муносибати ҷиддӣ дошта бошанд.

Аз тарафи иштирокчиёни вохӯрӣ пешниҳод шуд, ки ҷавононро ба варзиш ҷалбу завқманд бояд кард. Ба ин васила аз кӯчагардию ба амалҳои номатлуб даст задани онҳо, аз ҷумла нашъамандию нашъаҷаллобӣ ва пайвастан бо гурӯҳу ҳаракатҳои ифротгаро пешгирӣ менамоем.

Умед Мирзоев, “ҶТ”