Кумитаи кор бо ҷавонон ва варзиши назди Ҳукумати кишвар дар нимсолаи аввали соли 2017 дар самти татбиқи сиёсати давлатии кор бо ҷавонон ва варзиш, ҳамзамон соҳаи сайёҳӣ 13615 чорабинӣ бо фарогирии 3 миллиону 901 ҳазору 436 нафар, ки нисбат ба ҳамин давраи соли 2017, 1,7 маротиба зиёд гардида, фарогирӣ 2,2 маротиба афзоиш ёфтааст, баргузор намуд.

Аҳтам Абдуллозода, раиси Кумитаи кор бо ҷавонон ва варзиш, имрӯз 13 июл, зимни нишасти хабарӣ иброз дошт, ки бо мақсади таъмини иштироки васеи варзишгарони дастаи мунтахаб дар мусобиқаҳои байналмилалӣ дар давраи ҳисоботӣ бо маблағгузории Кумита 223 нафар варзишгар, аз ҷумла 26 бону ба 23 чорабинӣ, бо харҷи 666 246 сомонӣ сафарбар гардида, дар натиҷа ба хазинаи варзишии ҷумҳурӣ 158 медал, аз ҷумла 46 тилло, 41 нуқра ва 71 биринҷӣ ворид намуданд.

Гуфта шуд, ки Кумита дар якҷоягӣ бо сохтору ташкилотҳои системаи худ дар маҷмуъ то ба имрӯз 8944 чорабиниҳои гуногуни илмӣ-амалӣ, фарҳангӣ-фароғатӣ, конфронсу форумҳо, ҳамоишу аксияҳо ва мулоқоту вохӯриҳоро дар баргузор намуд, ки ин шумора нисбат ба ҳамин давраи соли гузашта 2,2 маротиба зиёд мебошад. Дар натиҷаи чорабиниҳои доирнамуда 2873313 нафар дар маҷмуъ фаро гирифта шуд, ки ин шумора нисбат ба ҳамин давраи соли гузашта 3,1 маротиба зиёд ба ҳисоб меравад.

Иттилоъ дода шуд, ки вобаста ба дастовардҳои варзишгарон дар нимсолаи якуми соли 2017 Комиссияи унвондиҳии Кумита 1 маротиба моҳи май 99 ҳуҷҷатро, ки барои гирифтани унвони варзишӣ пешниҳод гардида буданд, мавриди баррасӣ қарор дод. Дар натиҷа ба 11 нафар “Номзади Устоди варзиши Ҷумҳурии Тоҷикистон”, ба 71 нафар “Устоди варзиши Ҷумҳурии Тоҷикистон”, ба 5 нафар “Устоди варзиши дараҷаи байналмилалӣ” ва ба 1 нафар “Устоди шоистаи варзиши Ҷумҳурии Тоҷикистон” дода шуд.





Беҳрӯз ХОЛМУРОДОВ, “ҶТ”