Бо Фармони Президенти Ҷумҳурии Тоҷикистон имрӯз - 15 июн Ҷоизаи байналмилалии Президенти Ҷумҳурии Тоҷикистон дар соҳаи об таъсис дода шуд.

Дар ин бора дафтари матбуоти раисҷумҳури кишвар хабар дода, менависад, ки ҳадаф аз таъсиси ин ҷоиза ҳавасмандгардонӣ ва эътирофи сатҳи олӣ барои саҳми арзанда дар рушди ҳамкориҳои байналмилалӣ, таҳқиқот, сиёсати устувор, инчунин, ҳалли масъалаҳои глобалии об ва тағйирёбии иқлим мебошад.

Гуфта мешавад, ки Ҳукумати Ҷумҳурии Тоҷикистон дар давоми ду моҳ низомнома ва ҳайати Комиссияи Ҷоизаи байналмилалии Президенти Ҷумҳурии Тоҷикистон дар соҳаи обро таҳия ва тасдиқ хоҳад кард.

Дар ҳайати комиссияи намояндагони Донишкадаи об, муҳити зист ва тандурустии Донишгоҳи Созмони Милали Муттаҳид низ шомил карда мешаванд ва маросими ҷоизасупорӣ дар доираи чорабиниҳои байналмилалӣ дар соҳаи об, ки дар Тоҷикистон баргузор мегарданд, сурат хоҳад гирифт.