Академияи миллии илмҳои Тоҷикистон бо муассисаҳои илмӣ ва ташкилотҳои шарики 12 кишвари хориҷӣ 27 санади ҳамкорӣ ба имзо расонидааст. Аз ҷумла, 5 созишномаи ҳамкорӣ, 5 шартнома ва 17 ёддошти тафоҳум ба тасвиб расида, ҳамчунин 18 санади дигари ҳамкорӣ дар марҳилаи баррасӣ ва омодагӣ ба имзо қарор доранд.

Дар ин бора имрӯз Қобилҷон Хушвахтзода, президенти Академияи миллии илмҳои Тоҷикистон зимни нишасти хабарӣ иттилоъ дод.

Ба таъкиди номбурда яке аз дастовардҳои муҳими давраи ҳисоботӣ интихоб гардидани 20 нафар олимони Тоҷикистон ба ҳайси аъзои пайваста ва вобастаи Академияи илмҳои Осиё мебошад, ки ин нишонаи эътирофи дастовардҳои илмии олимони тоҷик дар сатҳи байналмилалӣ арзёбӣ мегардад.

Дар идома илова гардид, ки дар давраи ҳисоботӣ 142 нафар олим ва коршиноси хориҷӣ барои иштирок дар чорабиниҳои илмӣ, татбиқи таҳқиқоти муштарак ва табодули таҷриба ба Академияи миллии илмҳои Тоҷикистон даъват шудаанд. Ҳамчунин, 113 нафар корманди Академия барои иштирок дар конференсияҳо, семинарҳо, форумҳои илмӣ, татбиқи таҳқиқоти муштарак ва коромӯзӣ ба хориҷи кишвар сафар кардаанд.

М. МУҚАДДАМОВА, “ҶТ”