Владимир Ғуломҳайдаров, яке аз чеҳраҳои шинохта ва собиқадори футболи тоҷик, бозигари пешини дастаи “Помир”-и Душанбе ва узви собиқи мунтахаби олимпии Иттиҳоди Шӯравӣ, имрӯз дар шаҳри Маскав дар синни 80-солагӣ аз олам даргузашт. Дар ин бораи сомонаи ТВ “Варзиш” хабар медиҳад.

Даргузашти ӯ барои ҷомеаи футболи тоҷик талафоти ҷиддӣ арзёбӣ мешавад. Ғуломҳайдаров аз зумраи он варзишгароне буд, ки дар рушду муаррифии футболи тоҷик ҳам дар давраи шуравӣ ва ҳам дар солҳои аввали истиқлол нақши муҳим бозидааст.

Вай дар замони фаъолияти бозигарии худ дар ҳайати дастаҳои “Энергетик”-и Душанбе, “Торпедо”-и Маскав ва “Помир”-и Душанбе ҳунарнамоӣ кардааст. Ӯ ҳамчун нимҳимоятгар бо техникаи баланд, диди хуби майдон ва маҳорати ташкили ҳамлаҳо миёни мухлисон ва мутахассисони футбол шинохта мешуд.

Ғуломҳайдаров, ҳамчунин, ба ҳайати мунтахаби олимпии Иттиҳоди Шуравӣ шомил шуда, дар 8 бозӣ 3 гол ба самар расондааст. Ҳузури ӯ дар чунин сатҳи баланд нишон аз истеъдод ва маҳорати варзишии ӯ медод.

Пас аз анҷоми фаъолияти бозигарӣ, Владимир Ғуломҳайдаров ба кори мураббигӣ гузашт. Аз соли 1978 ба тарбияи футболбозони ҷавон машғул шуда, дар солҳои гуногун сармураббии дастаҳои “Помир” ва “Вахш” буд.

Соли 1994 ӯ роҳбарии тими миллии Тоҷикистонро бар уҳда гирифт. Ин давра ба солҳои аввали ташаккули футболи миллӣ дар замони истиқлол рост меомад, замоне, ки варзиши кишвар бо мушкилоти зиёди сохторӣ ва молиявӣ рӯбарӯ буд. Бо вуҷуди ин, Ғуломҳайдаров барои нигоҳ доштани сатҳи рақобатпазирии футбол дар кишвар талошҳои назаррас анҷом дод.

Ӯ ҳамчунин дар чанд бошгоҳи Қазоқистон низ фаъолияти мураббигӣ дошта, таҷрибаи чандинсолаи худро дар рушди футбол ба наслҳои баъдӣ интиқол додааст.

Номи Владимир Ғуломҳайдаров дар таърихи футболи тоҷик ҳамчун яке аз чеҳраҳои таъсиргузор боқӣ хоҳад монд.

Яҳё МАҲМАДНАБИЕВ, “ҶТ”