Дар варзишгоҳи Фурудгоҳи байналмилалии Хуҷанд бо мақсади омодагӣ ба мавсими бозиҳои Лигаи Олӣ оид ба футбол ва мутобиқ намудани варзишгоҳ ба талаботҳои Федератсияи футболи Тоҷикистон корҳои таъмирӣ идома дорад. Дар доираи он азнавсозии ҷойи нишасти меҳмонон, доварон, тамошобинон ва дигар инфрасохтори варзишгоҳ амалӣ гардида, бунёди маҷмааи қабули бозигарон ба нақша гирифта шудааст.

Дар ин бора Қурбони Алимардон, директори генералии ҶСК Фурудгоҳи байналмилалии Хуҷанд зимни нишасти матбуотӣ маълумот дод.

Гуфта шуд, ки Фурудгоҳи байналмилалии Хуҷанд дар нимсолаи аввали соли равон ба 327 ҳазору 854 нафар мусофир хизмат расонидаст. Парвозҳо аз ҷониби 6 ширкати ҳавопаймоӣ иҷро карда мешавад. Дар ин давра аз ҷониби ширкати ҳавопаймоии ҶДММ "Сомон Эйр" дар 204 хатсайрҳои байналмилалӣ ва 168 хатсайри маҳаллӣ хизматрасонӣ ба анҷом расонида шудааст.

Иброз гардид, ки ба масъалаи такмили донишу малакаи касбии кормандони фурудгоҳ таваҷҷуҳи зарурӣ равона шуда, дар самти рушди қобилияти касбӣ ва сатҳи хизматрасонии мусоир чораҳо амалӣ шудаанд. Дар доираи ин сиёсати кадрӣ танҳо давоми соли гузашта 120 нафар кормандони сохтору хадамотҳои гуногуни Фурудгоҳ курсҳои такмили ихтисосро хатм намудаанд.
Гуфта мешавад, ки роҳбарияти Фурудгоҳи байналмилалии Хуҷанд дар оянда вобаста ба пешгирии пастшавии ҳаҷми ҳамлу нақл, ташкили хатсайрҳои нав, беҳтар намудани низоми амният ва баланд бардоштани сатҳу сифати хизматрасонӣ тадбирҳои муҳиму муассирро роҳандозӣ мекунад.

С. ҚОДИРОВ, “ҶТ”