24 июн дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба 29 – умин солгарди Ҷашни Ваҳдати миллӣ ҳамоиши ҷашнии ҷавонону варзишгарон таҳти унвони “Мактаби сулҳофарии Пешвои миллат – роҳнамои мо ҷавонон” баргузор гардид.

Ҳамоиш бо иштироки Раҳимзода Шабнам, муовини якуми раиси Кумитаи кор бо ҷавонон ва варзиш, Кароматулло Олимов, академики Академияи миллии илмҳои Ҷумҳурии Тоҷикистон, Махфират Хидирзода, узви Комиссияи марказии интихобот ва раъйпурсии Ҷумҳурии Тоҷикистон, Адолат Раҳмонова, собиқадори хизмати давлатӣ, вакили Иҷтисияи 16 – уми Шурои Олии Тоҷикистон, ҳамчунин, кормандони дастгоҳи марказии Кумита, Иттифоқи ҷавонони Тоҷикистон, аъзои Ташкилоти ҷамъиятии “Пайравони Пешвои миллат”, мураббиёну варзишгарон ва кормандони сохторҳои тобеи Кумита дар шаҳри Душанбе доир шуд.

Дар ҳамоиш перомуни хизматҳои мондагори Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сухан рафта, қайд гардид, ки бо шарофати ҷоннисориҳо ва азхудгузаштанҳои ин абармарди таърихӣ Тоҷикистон ба чунин рӯзҳои нек расида, аз ҷумлаи амнтарин кишварҳо дар миқёси ҷаҳон пазируфта шуд.

- Пешвои миллат ҳамчун поягузори Ваҳдати миллӣ ва заминасози Созишномаи истиқрори сулҳ ва ризоияти миллӣ дар Тоҷикистони навин эътироф гардида, камолоти давлатдории миллӣ ва рушду нумуи он ба хизматҳои падаронаи ин шахсияти нотакрор ва таърихӣ вобаста мебошад. Маҳз бо шарофати сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва неруи тавонои миллати тоҷик дар ҷумҳурӣ сулҳу оромӣ, ҳамдигарфаҳмӣ ва ягонагии миллӣ устувор гардида, мардуми шарафманди Тоҷикистон дар фазои сулҳу суботи ҳамешагӣ умр ба сар бурда истодаанд. Маҳз Ваҳдати миллӣ ҳамчун омили асосии пешрафти давлат барои амалишавии ҳадафҳои стратегии давлат ва беҳтар гардидани сатҳи зиндагии мардум мусоидат намуд, - иброз дошт Шабнам Раҳмизода.

Дар идома қайд гардид, ки Ваҳдати миллӣ омили баҳамоии мардум ва некуаҳволии ҳар як сокини кишвар мебошад. Ваҳдат арзишест, ки онро аз дигар сарвату дороиҳо бояд боло гузошт, онро чун неъмати илоҳӣ қадр кард ва мисли Модар ва Ватан ҳифз намуд. Ваҳдати миллӣ якдилии халқ, ҳамдигарфаҳмӣ, муқаддас донистани якпорчагии ватан, сарҷамъ шудан дар ватани аҷдодӣ, эҳтироми якдигар ва сар баровардан аз як гиребон барои ҳифзи арзишҳо ва манфиатҳои миллӣ аст.

- Имрӯз бо шарофати Ваҳдати миллӣ иқтидори иқтисодии мамлакат рӯз то рӯз афзуда, робитаҳо дар самти ҳамкорӣ бо дигар давлатҳои ҷаҳон то рафт мустаҳкам мегардад. Бо шарофати Ваҳдати миллӣ имрӯз симои марказҳои шаҳрҳо ва ноҳияҳо рӯз то рӯз тағйир ёфта, биноҳои маъмурию маишӣ, фарҳангӣ ва манзилҳои нав, варзишгоҳҳои замонавӣ ба ҳусни ватани азизу маҳбубамон ҷилои дигар мебахшанд, ки ин меваи Ваҳдати миллӣ ба ҳисоб меравад, - гуфта шуд дар идома.

Дар поёни ҳамоиш қисмати фарҳангии он доир гардида, аз ҷониби мутрибон суруду оҳангҳои ҷашнӣ суруд шуд.