Дар доираи омодагӣ ба маъракаи муҳими дарпешистода – раъйпурсии умумихалқӣ оид ба ворид намудани тағйиру иловаҳо ба Конститутсияи Ҷумҳурии Тоҷикистон имрӯз дар шаҳри Душанбе дар  ҳамкорӣ бо Комиссияи марказии интихобот ва раъйпурсии Ҷумҳурии Тоҷикистон ва бахши Иттифоқи ҷавонони Тоҷикистон дар шаҳри Душанбе дар мавзӯи «Аҳамияти арзишҳои конститутсионӣ дар тарбияи ҳуқуқии ҷавонон» мизи мудаввар баргузор гардид.

Гуфта шуд, мақсад таъсиси гурӯҳҳои таблиғотӣ ҷиҳати ба шаҳрвандон расонидани моҳияти тағйиру иловаҳо ба Конститутсияи Ҷумҳурии Тоҷикистон ва ҷалби ҷавонон ба раванди омодагӣ ба раъйпурсӣ мебошад.

Мизи мудавварро раиси бахши Иттифоқи ҷавонони Тоҷикистон дар шаҳри Душанбе Аббос Саймуддинов ифтитоҳ карда, вакили Маҷлиси вакилони халқи шаҳри Душанбе Сайфулло Сафаров атрофи тарбияи ҳуқуқии ҷавонон андешаронӣ намуд.

Роҳбари дастгоҳи Комиссияи марказии интихобот ва раъйпурсӣ Абдуманон Додозода оид ба рафти омодагиҳо ва корҳои аз ҷониби КМИР то имрӯз ба анҷомрасида сухан гуфта, нақши ҷавононро дар ҳаёти сиёсиву иҷтимоии кишвар муҳим арзёбӣ намуд.

Зикр шуд, ки ҷавонони фаъоли пойтахт дар арафаи баргузории раъйпурсии умумихалқӣ ба комиссияҳои раъйпурсӣ ҷиҳати паҳн намудани маводи тарғиботию ташвиқотӣ, инчунин ба шаҳрвандон расонидани хабарномаҳо метавонанд кӯмак расонанд.

Иштирокчиёни чорабинӣ изҳори бовар намуданд, ки ҷавонони кишвар барои дар сатҳи баланди ташкилӣ омода ва баргузор намудани раъйпурсии умумихалқӣ мусоидат намуда, дар пешрафти ҳаёти сиёсии кишвар саҳми муносиб мегузоранд.