Дар шаҳри Новокузнести Федератсияи Русия ифтитоҳи намоишгоҳи "Тоҷикистон, таърих, фарҳанг ва ҳунарҳои мардумӣ" дар доираи эълон гардидани солҳои 2019 – 2021 “Солҳои рушди деҳот, сайёҳӣ ва ҳунарҳои мардумӣ” ифтитоҳ гардид.

Иқдоми мазкур аз ҷониби намояндагии маҳфили “Ҷавонони дар хориҷи кишвар таҳсилдошта” ва Ташкилоти ҷамъиятии “Дӯстии халқҳои тоҷику рус” доир гардида, шумораи зиёди шаҳрвандони хориҷӣ аз намоишгоҳи мазкур дидан намуданд.

Дар намоишгоҳи мазкур маҳсулоти ҳунарҳои маъруфи анъанавӣ - қолинбофӣ ва рангуборкунӣ, бофандагӣ, гулдӯзии аслии дастӣ ва либосҳои миллӣ (идона ва ҳамарӯза), асбобҳои мусиқии халқии дастӣ ва маҳсулоти чармӣ ба намоиш гузошта шуда, аз ҳунару фарҳанги волои миллати тоҷик шаҳрвандони хориҷӣ дар ҳайрат монданд.

Тоҳиров Шавкат Исломович, раиси Ташкилоти ҷамъиятии “Дӯстии халқҳои тоҷику рус” дар вилояти Кемерово намоишро ифтитоҳ намуда, ба меҳмонон дар бораи ҳаёт, ҳунармандӣ, меъморӣ ва таърихи халқи тоҷик суханронӣ намуд.

Ҳамзамон, роҳбари намояндагии маҳфили “Ҷавонони дар хориҷи кишвар таҳсилдошта” дар шаҳри Новокузнес Зокиров Мирзо иштирокдорони намоишро хушомадед гуфта, дар бораи таърих ва фарҳанги миллати тоҷик суханронӣ кард.

Дар ин намоишгоҳ меҳмонони фахрӣ роҳбарон ва намояндагони иттиҳодияҳои миллии шаҳр низ ҳузур доштанд.

Намоишгоҳ муддати як моҳ идома ёфта, шаҳрвандон ва меҳмнони шаҳри мазкур бо фарҳангу анъана ва расму оини миллати тоҷик аз наздик ошно мегарданд.