Бозии даври ниҳоии мусобиқаи Ҷоми Тоҷикистон-2018, 27 октябр миёни дастаҳои “Истиқлол”-и шаҳри Душанбе ва “Регар-ТадАЗ”-и шаҳри Турсунзода дар Варзишгоҳи марказии шаҳри Ваҳдат баргузор гардид.

Дар ин дидор “Истиқлол” бар тими “Регар-ТадАЗ” ғалаба кард, (1:0 ) дар таърихи мавҷудияташ маротибаи 7-ум Ҷоми Тоҷикистонро ба даст овард.

Голи ягонаро ҳамлавгар Комрон Турсунов дар дақиқаи 60-уми бозӣ ба ҳадаф расонда, беҳтарин бозингари ин вохӯрӣ дониста шуд.

Дар маросими ҷоизасупорӣ баъд аз вохӯрии ниҳоӣ Абдуллозода Аҳтам, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, раиси шаҳри Ваҳдат Раҳмоналӣ Амирзода, ноибони президенти Федератсияи футболи Тоҷикистон Дилшод Ҷӯраев ва Алишер Урунов, ҳамчунин намояндаи расмии ширкати «Huawei» дар Тоҷикистон Суй Фэн ширкат намуданд.

Ғолиби Ҷоми Тоҷикистон-2018 – дастаи “Истиқлол”-и Душанбе дар баробари медали тилло ҷоизапулӣ дар ҳаҷми 30000 сомонӣ дарёфт кард. “Регар-ТадАЗ” бошад, соҳиби медали нуқра ва ҷоизапулӣ дар ҳаҷми 20000 сомонӣ гардид.