Дар ноҳияи Данғара маросими ифтитоҳи даври дуюми “Фестивали бозиҳои миллии варзишӣ” бахшида ба 20-солагии Рӯзи ваҳдати миллӣ ва “Соли ҷавонон” баргузор гардид.

Сараввал бозиҳои намоишӣ, аз қабили чавгонбозӣ, камандкашӣ, камонварӣ, найзазанӣ, шамшербозӣ, шатранҷбозӣ, арғунчакбозӣ, чилликдангалбозӣ, буҷулбозӣ, намудҳои варзиши сабук, гимнастика, дорбозӣ, гулӯлапартоӣ, сангбардорӣ ва гӯштингирӣ дар сатҳи баланди баргузор гардид.

Дар доираи Фестивал мусобиқаи гӯштини миллӣ байни ҷавонон аз рӯи вазнҳои 60, 80 ва 100 кг баргузор гардида, ғолибон бо диплому медалҳо сарфароз гардонида шуданд.

Ин фестивалро дар баробари иштирокдорон зиёда аз ду ҳазор мухлисону ҳаводорони бозиҳои миллии варзишӣ тамошо карданд.

Зимни Фестивал муовини раиси вилояти Хатлон Махфират Хидирзода иштирокдоронро табрик гуфта, таъкид дошт, ки Кумитаи тадорукоти Фестивал бо баргузор намудани чунин ҳамоиш дар эҳёву арҷгузорӣ ба намудҳои миллии варзишӣ саҳми сазовор гузоштанд.

Фестивали бозиҳои миллии варзишӣ дар ду марҳала - рақобати даставӣ ва бозиҳои намоишӣ доир карда мешавад.

Даври дуюми Фестивали бозиҳои миллии варзишӣ то 27 июн аз рӯи намудҳои зикргардида дар сатҳи минтақавӣ ва вилоятӣ баргузор карда мешавад.