Конфедератсияи футболи Осиё Душанберо ба ҳайси мизбони даври интихобии Ҷоми Осиё миёни дастаҳои мунтахаби бонувон тасдиқ кард.

Қуръапартоии даври интихобии Ҷоми Осиё-2018 миёни бонувон 21 январ дар Уммон баргузор мешавад. Дар мусобиқа дар баробари тими футболи бонувони Тоҷикистон, дастаҳои футболи занонаи Кореяи Ҷанубӣ, Тайланд, Ветнам, Урдун, Мянма, Тайбэйи Чин, Узбекистон, Филиппин, Ҳонконг, Лубнон, Баҳрайн, Эрон, Ҳинд, Фаластин, Кореяи Шимолӣ, Гуам, Ироқ, Сингапур, Сурия ва АМА ширкат мекунанд.

Тими миллии бонувони Урдун оид ба футбол ҳамчун мизбони Ҷоми Осиё-2018 дар даври интихобӣ ширкат мекунад, аммо барои роҳхат талош намекунад.

Дастаҳо дар натиҷаи қуръапартоӣ ба чор гурӯҳ – 3 гурӯҳи 5-дастаӣ ва як гурӯҳи шашдастаӣ тақсим мешаванд. Даври интихобӣ 3-12 апрели соли равон дар Тоҷикистон, Фаластин, Кореяи Шимолӣ ва Ветнам доир мегардад.

Ба даври финалии Ҷоми Осиё-2018 ғолибони чор гурӯҳ роҳ меёбанд. Ба даври финалӣ се дастаи беҳтарини чемпионати охирин (Ҷопон, Автралия, Чин), ки соли 2014 дар Ветнам доир гашта буд, роҳ ёфтаанд.