Рӯзи 10 августи соли ҷорӣ дар толори муассисаи давлатии мактаби маҳорати олии варзишии вилояти Хатлон бахшида ба Рӯзи варзишгарон бо иштироки собиқадорони соҳаи варзиш, кормандон, мураббиён ва варзишгарон чорабинии идона доир гардид.

Дар чорабинӣ директори муассисаи давлатии мактаби маҳорати олии варзишии вилояти Хатлон Рустам Давлатшоев варзишгаронро табрик намуда, иброз дошт, ки “Имрӯз варзишгарони ҷавони вилоят анъанаҳои неки падарону бобоёни шуҳратманди хешро идома медиҳанд. Онҳо дар мусобиқаҳои бонуфузи байналмилалӣ қувваозмоӣ намуда, нуфузи варзиши кишварамонро ба ҷаҳониён муаррифӣ менамоянд”.

Азиз Азимов, муовини сардори Раёсати кор бо ҷавонон ва варзиши вилояти Хатлон иброз намуд, ки бо мақсади ҷалби бештари аҳолӣ, хусусан наврасону ҷавонон ба варзиш дар ҳудуди вилояти Хатлон ҳамасола аз тарафи Ҳукумати Ҷумҳурии Тоҷикистон иншоотҳои варзишӣ мавриди истифодабарӣ қарор мегиранд. Ин боиси хушнудии ҳар як сокини вилоят мебошад.

Дар фарҷом аз ҷониби муассисаи давлатии мактаби маҳорати олии варзишии вилояти Хатлон ба 20 нафар варзишгарон ва мураббиёни собиқадор туҳфа ва сипоснома супорида шуд.

Умед МИРЗОЕВ, “ҶТ”