Аз 23 то 27 августи соли 2017 бахшида ба 26-солагии Истиқлолияти давлатӣ ва “Соли ҷавонон”, дар Корти тенниси тобистонаи КВД “Роҳи оҳан”-и Тоҷикистон Мусобиқаи байналмилалӣ барои дарёфти Ҷоми Президенти Тоҷикистон оид ба теннис байни наврасон барои дарёфти Ҷоми Президенти Ҷумҳурии Тоҷикистон баргузор гардид.

Дар доираи ин мусобиқа ҳам духтарон ва ҳам писарон дар мусобиқаҳои якнафара ва дунафара байни ҳам рақобат намуданд.

Теннисбозони навраси тоҷик дар ин сабқат маҳорати хуби варзишӣ нишон дода, нагузоштанд, ки Ҷоми Президенти Ҷумҳурии Тоҷикистон аз кишвар берун шавад ва онро бори шашум соҳиб гардиданд.

Дар мусобиқаи мазкур, ки 80 нафар (аз ҷумла 27 духтар) варзишгарон аз ҷумҳуриҳои Афғонистон, Туркия, Ӯзбекистон, Украина, Қазоқистон, Русия ва Тоҷикистон ширкат доштанд, аз рӯи натиҷаи охирон Ҷоми Президент насиби соҳибони майдон гардид.

Пас аз чанд рӯзи рақобат дар мусобиқаҳои якнафара миёни писарон ҷойҳои аввал ва дуюм насиби Исамҷон Шарифов ва Хушбахт Каримов аз Тоҷикистон ва ҷои сеюм насиби Саид Акбаров аз Ӯзбекистон шуд. Миёни духтарон бошад ҷойҳои якум, дуюм ва сеюм насиби теннисбозони навраси тоҷик Анастасия Турсунова, Наргиза Яҳёева ва Комила Муллоева гардид.

Дар масобиқаи дунафара бошад дар гурӯҳи духтарон ҷои аввал насиби Анастасия Турсунова ва Наргиза Яҳёева (Тоҷикистон), мақоми дуюм Комила Муллоева (Тоҷикистон) ва Мария Никитюк (Украина) ва ҷои сеюм сазовори Амина Шерхонова ва Рамина Муллоева (Тоҷикистон) дониста шуд.

Миёни писарон бошад ҷои аввал насиби Аминҷон Абдуллоев ва Мансур Мирзоев гардида, ҷои дуюмро Исамҷон Шарипов ва Хушбахт Каримов ва мақоми сеюмро Мараматшо Аёмбеков (Тоҷикистон) ва Саид Акбаров (Узбекистон) соҳиб шуданд.

Мусобиқа оид ба теннис барои дарёфти Ҷоми Президенти Тоҷикистон соли 2005 таъсис ёфта, бори ҳаштум аст, ки байни варзишгарони наврас (12-15-сола) баргузор гардид.

Соли ҷорӣ варзишгароне, ки ҷои аввалро ишғол намуданд, соҳиби 1000 доллари ИМА, ҷои дуюм 800 доллар ва ҷои сеюм 500 доллар гардиданд.

Барои мақомҳои якум, дуюм ва сеюми сабқати ҷуфтӣ бошад, мутаносибан 1000, 800 ва 500 доллар мукофот дода шуд.

Далер Қурбонов, сармураббии тенниси ҷумҳурӣ, мусобиқаи байналмилалии Ҷоми Президенти Ҷумҳурии Тоҷикистон оид ба теннис байни наврасонро яке аз мусобиқаҳои бошукӯҳ номида, сол то сол дар сатҳи баланд доир гардидани мусобиқа ва аз инкишоф ёфтани ин риштаи варзиш дар кишвар сухан намуд: “Боиси хушбахтист, ки сол аз сол мусобиқаи Ҷоми Президент дар сатҳи баланди варзишӣ доир гашта истодааст ва мо тасмим гирифтаем, ки барои мусобиқаи соли оянда варзишгарони худро боз ҳам тамрини хуб диҳем ва нагузорем, ки чун имсол ва солҳои қаблӣ шоҳҷоиза аз кишвар берун равад. Ҳамчунин, барои омода шудани варзишгарони тоҷик дар мусобиқаҳои берун аз кишвар ин чорабинӣ як таҷрибаи бузург аст”.

Шарипов Исамҷон, ки соли гузашта дар мусобиқаи мазкур ҷои дуюмро ба даст оварда буд, баъди тамринҳои пайваста, имсол бо омодагии ҷиддӣ ба майдон баромад ва мақоми аввалро ба даст овард. "Як сол қабл вақте ки ҷои дуюмро гирифтам, назди худ мақсад гузоштам, ки бояд дар соли оянда ҷои аввалро соҳиб шавам. Маҳз ислоҳи баъзе заифиҳо имкон дод, ки имсол ҷои аввалро гирифтам. Дар оянда тасмим дорам, ки дар мусобиқаҳои сатҳи ҷаҳонӣ бо ишғоли ҷойҳои намоён давлату миллатамро муаррифӣ намоям",-мегӯяд Исамҷон.

Дар ҷамъбасти мусобиқа раиси Кумитаи кор бо ҷавонон варзиши назди Ҳукумати ҷумҳурӣ Аҳтам Абдуллозода ба нафароне, ки сазовори ҷойҳои ифтихорӣ гардиданд, миннатдории Кумитаи тадорукотро расонида, изҳор дошт: “Зери сарпарастӣ ва ғамхориҳои пайваставу ҳамарӯзаи Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон варзиши тоҷик рӯз аз рӯз рушт карда истодааст. Мо итминони комил дорем, ки чунин чорабиниҳо барои боз ҳам қавӣ ва мустаҳкам гардидани робитаҳои дӯстона миёни варзишгарони навраси давлатҳои ҷаҳон мусоидат мекунад”.

Раиси Кумита дар фарҷоми суханрониаш мусобиқаи байналмилалиро барои дарёфти Ҷоми Президенти Ҷумҳурии Тоҷикистон оид ба теннис пушида эълон намуд.

Хуршед МАВЛОН, “ҶТ”