САЙЁҲӢ
Душанбе 28 Май 2018 04:08
2953
2 июн дар шаҳри Фужоуи Ҷумҳурии мардумии Чин семинари "Рушди ҳамкорӣ дар соҳаи сайеҳӣ миёни Тоҷикистону Чин дар соли 2017" ба кори худ оғоз намуд, ки дар он ҳайати Тоҷикистон иборат аз 20 нафар мутахассисону кормандони ҷавони идораву ташкилотҳои соҳаи сайёҳии Тоҷикистон ширкат доштанд.

Ван Сзянгуан, муовини сардори Маркази омодакунии кадрҳои сиёсати иқтисоди хориҷии вилояти Футзиян ташрифи меҳмононро шодбош гуфта, ба кори семинар оғоз бахшид. “Тоҷикистон яке аз шарикони асосии кишвари Чин дар соҳаи сайёҳӣ ба ҳисоб меравад. Мо боварӣ дорем, ки семинари мазкур баҳри бештар ошно гардидан ба расму оин, мавзеҳои таърихӣ ва муаррифии ин ду кишвари дӯсту бародар заминаи бештар фароҳам меорад”, - гуфт Ван Сзянгуан.

Дилшод Давлатзода, намояндаи Дастгоҳи иҷроияи Президенти Ҷумҳурии Тоҷикистон аз номи иштирокчиён масъулинро барои меҳмоннавозияшон сипос гуфта, дар мавриди ҳамкориҳои Тоҷикистону Чин дар соҳаи сайёҳӣ ва ташрифи шаҳрвандони Чин ба Тоҷикистон баромад намуд.

Маърузаи якуми семинари мазкур аз чониби профессор Сун Личжун дар мавзӯи "Ҳифзи ёдгориҳои таърихии ҷаҳонӣ ва ташаккули туризми фарҳангӣ" шунида шуд.

Семинар то 21 июн идома меёбад ва оиди паҳлӯҳои гуногуни соҳаи сайёҳӣ мутахассисони соҳаи туризми Ҷумҳурии Мардумии Чин ба иштирокчиён маърӯза мехонанд.

Муаррифии мавзеъҳои сайёҳии Тоҷикистон

Нимаи дуюми рӯзи 3 июн дар шаҳри Фучжоуи Ҷумҳурии мардумии Чин вохӯрии иштирокчиёни семинари "Рушди ҳамкорӣ дар соҳаи сайёҳӣ миёни Тоҷикистону Чин дар соли 2017" бо намояндагони ширкатҳои сайёҳии кишвари Чин доир гардид. Вохӯрии мазкур бо тамошои мавзеъҳои таърихию сайёҳии Тоҷикистон, ки дар шакли видеоролик пешниҳод гардид, оғоз ёфт. Дар видеоролик беҳтарин мавзеъҳои таърихию сайёҳӣ, боду ҳавои мусаффо ва рӯду чашмаҳои шифобахши Тоҷикистони офтобӣ нишон дода шуд.

Баъдан намояндагони ширкатҳои сайёҳӣ имкониятҳои худро муаррифӣ намуданд. Лун Юэ, директори генералии Ширкати байналмилалии сайёҳии шаҳри Фучжоу зимни баромад таъкид намуд, ки пас аз дидани мавзеъҳои сайёҳии Тоҷикистон дар вақти барояш мувофиқ баҳри аз наздик ошно шудан ба Тоҷикистон сафар мекунад.

Дар охир доир ба тарғиби бештари соҳаи сайёҳӣ ва ҳамкориҳои дуҷониба миёни иштирокчиёни семинар ва намояндагони ширкатҳои сайёҳӣ суҳбати озод доир гардид.

3 кӯчаву 7 тангкӯчаи Фучжоу

Дар доираи нақшаи семинари “Рушди ҳамкории соҳаи сайёҳӣ миёни Тоҷикистон ва Чин дар соли 2017" 4 июн намояндагони соҳаи сайёҳии кишвар аз мавзеъҳои туристии шаҳри Фучжоуи давлати Чин дидан намуданд. Зимни шиносоӣ бо таърихи шаҳр иттилоъ доданд, ки Фучжоу дар солҳои ‎1993-1994 яке аз шаҳрҳои қашшоқи музофоти Футзия буд. Мардуми ин мавзеъ ба соҳаи сайёҳӣ майл надоштанд. Соли 1993 як тоҷир аз Гонконг 3 кӯча ва 7 тангкӯчаи шаҳри мазкурро харидорӣ намуда, дар он биноҳои баландошёнаи замонавӣ бунёд мекунад. Баъди рушд намудани соҳаи сайёҳӣ дар Фучжоу соли 2005 музофоти Футзия мавзеи мазкурро аз тоҷири гонконгӣ бозпас гирифта, ба Ҳукумати шаҳри Фучжоу қарз медиҳад.

Намояндагони соҳаи сайёҳии шаҳри Фучжоу биноҳои баландошёнаи мавзеи мазкурро хароб намуда, ба барқароркунии шаҳри кадима, ки ифодагари фарҳанги пешинаи мардуми шаҳр буд, мепардозанд. Баъди барқарор намудани 3 кӯчаву 7 тангкӯча дар шакли пешина шумораи сайёҳон ба шаҳри Фучжоу меафзояд. Ҳукумати шаҳри Фучжоу дар кӯтоҳтарин муддат қарзи худро ба музофоти Футзия месупорад ва дар муддати ду сол шаҳри мазкур аз ҳисоби соҳаи сайёҳӣ ба буҷаи давлати Чин зиёда 20 миллиард юан фоида меорад.

Имрӯзҳо 3 кӯчаву 7 тангкӯча яке аз мавзеъҳои сердаромади соҳаи сайёҳӣ дар шаҳри Фучжоу ва музофоти Футзия ба ҳисоб меравад. Макони мазкур ягона мавзее мебошад, ки сайёҳони хориҷиро бо расму русум ва тарзи зиндагии мардуми музофот ошно месозад. Имрӯзҳо ҳазорон сайёҳ ба хотири дидани 3 кӯчаю 7 тангкӯча ба ин музофот ташриф меоранд.

Тибқи омори расмӣ аз 4-5 миллиард сайёҳони дохилию хориҷие, ки ҳамасола аз мазеҳои таърихии давлати Чин дидан мекунанд, 30-40 фисади онҳо барои дидани 3 кӯчаю 7 тангкӯча ҳатман меоянд.

Ҳарчанд баъди хароб гардидани мавзеи мазкур аксарият ёдгориҳои таърихии шаҳр нобуд шудааст, ҳукумати шаҳри Фучжоу кӯшиш намудааст, ки осорхонаҳояшро дар шакли пеш нигоҳ дорад.

Зимни боздид аз мавзеъҳои таърихӣ намояндагони Тоҷикистон низ бо сайёҳон ошноӣ пайдо намуда, Тоҷикистонро барои хориҷиён муаррифӣ намуданд ва онҳоро барои дидан даъват карданд.

Шодихони НАЗАР, шаҳри Фужоуи Чин, махсус барои “ҶТ”





Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

Май 2018 c.