- Баъзе аз ҷавонони мо ба гурӯҳои ифротиву террористӣ шомил шуда, даст ба амалҳои ғайриинсонӣ мезананд. Аз оқибатҳои ногувори ин кор, ки он танҳо марг аст, наандешида, ба роҳи нодуруст мераванду ҷони ҷавони худро барбод медиҳанд, аҳли оила, ва номи авлодро бад мекунанд. Хиёнати ин гуна нафаронро давлату миллат ҳаргиз намебахшад, гуфт генералмайор Солеҳзода Искандар Солеҳ.

Мақомоти иҷроияи ҳокимияти давлатии ноҳияи Абдураҳмони Ҷомӣ дар ҳамкори ба ШВКД ва Бахши ҷавонон, варзиш ва сайеҳии ноҳия дар доираи чорабиниҳо бахшида ба “Соли ҷавонон” баҳри баланд бардоштани маърифати ҳуқуқии аҳолӣ, маъсулияти ватандорӣ ва худшиносии миллӣ байни ҷавонону наврасон вохӯрӣ доир намуд.

Дар вохӯрӣ, муовини раиси ноҳия Хосият Неъматова, сардори Раёсати ВКД дар вилояти Хатлон генералмайор Солеҳзода Искандар Солеҳ, сардори ШВКД-и ноҳия Толиб Назарзода ва шуъбаю идораҳо, роҳбарони як қатор ташкилоту муассиса, фаъолон, шуроҳои занон, раисони кумитаҳои маҳалла, ҷанговарони башардӯст, омӯзгорон ва хонандагон иштирок доштанд.

Хосият Неъматова, ба сухан баромада иброз намуд, ки “Ҳануз ҳам ҳолатҳои ногувор дар ҷомеа ба назар мерасанд, ки он аз беэтиноӣ дар тарбияи ҷавонон дарак медиҳад”.

- Кирдорҳои ба нашъамандӣ майл намудани бархе аз ҷавонон низ аз ҳамин гуна амалҳои номатлуб аст, ки мутаассифона, дар ҷомеаи мо то ҳанӯз ҷой дорад. Пеши роҳи ҳамаи инро гирифтан кори як ҷониба набуда, ҳамкории умум мебояд. Ҳамкории мактаб, оила, аҳли ҷомеа бо мақомоти ҳифзи ҳуқуқ хело зарур аст, то ин ки чунин амалҳои наматлубро аз байн барем, иброз намуд Толиб назарзода.

Дар охир ҷавонон қавл доданд, ки бо рафтору амали неку бунёдкоронаи худ ба боварии давлату миллати хеш сазовор монда, дар пешгирии ҳама гуна амалҳои номатлуб саҳми худро мегузоранд.

Умед Мирзоев, "ҶТ"