Субҳони Саид, сарояндаи маъруфи кишвар, имшаб дар синни 56-солагӣ ин дунёро падрӯд гуфт.

Субҳон Саид чанд соли охир аз бемории қанд ранҷ мекашид.

Ӯ соли 1960 дар ноҳияи Ҳисор таваллуд шуда, таълими 8-соларо дар зодгоҳ мегирад. Таҳсилро дар Омӯзишгоҳи санъати ноҳияи Рӯдакӣ идома медиҳад. Солҳои 1979 то 1981 хидмати сарбозиро дар шаҳри Маскав адо мекунад.

Фаъолияти меҳнатиро баъд аз аскарӣ дар шуъбаи фарҳанги ноҳияи Ҳисор ба ҳайси киномеханик оғоз менамояд. Солҳои 1983 то 1985 дар ҳайати ансамбли эстрадии “Суғдиён” ба фаъолият мепардозад. Соли 1986 барои кор ба дастаи ҳунарии “Ганҷина”-и Филармонияи давлатӣ даъват мешавад. Аз соли 1993 то соли 2008 роҳбарии дастаи ҳунарии “Гулшан”-ро бар уҳда дошт.

Муаллифи даҳҳо оҳангу сурудҳои эстрадӣ ва мардумист. Соли 2003 дар озмуни сартосарӣ миёни овозхонҳои эстрадаи тоҷик бо касби мақоми аввал “Ситораи сол” эълон мешавад.

Оиладор, соҳиби 7 писар.