Дар замони рушди илму техника, ки бо суръати кайҳонӣ пеш меравад, худро канор гирифтану дар самте кореро сомон надодан ҳеҷ гоҳ муваффақият набуду нест. Барои ҳамрадифи замон будан, омӯхтани илму донишҳои гуногун ва дар амал татбиқ сохтани он зарур аст.

Аъзам Аҳруллоев бо дарки ин нукта, чун ҷавони даврони истиқлол, доим дар ҳаракат асту паи амалӣ намудани идеяҳои тоза. Ӯ нахустин ҷавонест, ки ба истеҳсоли пойафзол машғул асту дар ин роҳ то ҷое ҳам муваффақ гардидааст.

Аъзам Аҳруллоев, чун ихтироъкор ва соҳибкори ҷавон, ба истеҳсол ва фурӯши пойафзолҳои чармин, бо номи “Azam” машғул аст. Худи ӯ гуфт: “Беш аз як сол мешавад, ки дар ин ҷода фаъолият намуда истодаам. Зиёда аз чор моҳ мешавад, ки маҳсулоти худро танҳо тавассути онлайн, яъне интернет-магазин ба фурӯш бароварда истодаем”.

Вақте аз чи гуна пайдо шудани идеяи истеҳсол ва фурӯши пойафзол ва бо кадом мақсад ба роҳ мондани он пурсон шудем гуфт: “Чуноне ба ҳамагон маълум аст, дар Тоҷикистон маҳсулоти чармию пӯсти ҳайвонот хеле зиёд буда имконият ҳаст, ки аз чарми тоза пойафзол истеҳсол намоем. Идеяи истеҳсоли пойафзолҳои тоҷикӣ ва ба фурӯш баровардани он аз ҳамин ҷо пайдо шуд. Имрӯз якчанд сех дар ҷумҳурӣ ба истеҳсоли пойафзол машғуланд. Баробари пешниҳоди мо онҳо корро шуруъ намуданд. Ҳар модели пешниҳоднамудаи моро дӯхта медиҳанд. Имрӯз ин пойафзолҳоро ба воситаи интернет-магазин фурӯхта истодаем. Мақсади истеҳсоли мо ин аст, ки як дараҷае бошад ҳам, ба иқтисодиёти кишвари хеш фоида биёрем”.

Аъзам дар оянда фаъолияти худро равнақ бахшиданист, ки дар ин росто барояш барору комёбӣ хоҳонем.

Беҳрӯз ХОЛМУРОДОВ, "ҶТ"